Tuhaa 2—E faatere anaˈe i te mau haapiiraa bibilia o te paturu i te mau haereraa i mua
E faaineine anaˈe i te faatere i te haapiiraa
1 No te haapii ma te aravihi i roto i te hoê haapiiraa bibilia, eita e navai noa te aparauraa i te mau manaˈo o te mau paratarafa e te hiˈoraa i te mau irava i horoahia. E mea titauhia ia vauvau i tera mau manaˈo e putapû ai te aau o te piahi. E titauhia te hoê faaineine-maite-raa i reira tatou e manaˈo tamau ai i te piahi.—Mas. 15:28.
2 E nafea ia faaineine ia outou: A haamata ma te pure ia Iehova no taua taata ra e to ˈna mau hinaaro. A ani ia Iehova ia tauturu ia outou ia haaputapû i te aau o te piahi. (Kol. 1:9, 10) No te haamanaˈo maitai i te manaˈo tumu, a rave i te taime no te feruri i te upoo parau o te pene aore ra o te haapiiraa, te taio i te mau upoo parau iti e te hiˈopoa i te mau tauturu ite-mata-hia. A ui ia outou iho: “Eaha te manaˈo tumu o te taatoaraa?” E tauturu te reira ia outou ia haamau i to outou feruriraa i nia i te mau tuhaa faufaa ia faatere outou i te haapiiraa.
3 A hiˈopoa maite i te mau manaˈo i roto i te mau paratarafa atoa. A tapao i te mau pahonoraa o te mau uiraa ma te reni i te tahi noa mau taˈo e parau faufaa. A haroaroa i te tuatiraa i rotopu i te mau irava i horoahia e te mau tuhaa faufaa o te paratarafa, e a maiti i te mau irava ta outou e taio i te roaraa o te haapiiraa. Peneiaˈe e manaˈo outou e mea faufaa ia papai i te manaˈo tumu i te hiti o te papai. Ia taa maitai i te piahi e no roto mai ta ˈna e haapii ra i te Parau a te Atua, e tia ˈi.—Tes. 1, 2:13.
4 A faatano te haapiiraa i nia i te piahi: A haapii ma te manaˈo iho â râ i te piahi. A feruri na mua i ta ˈna mau uiraa e te mau manaˈo e mea fifi paha no ˈna ia taa aore ra ia farii. A ui ia outou iho: “Eaha te titauhia ia taa o ˈna aore ra ia ohipa no te haere i mua i te pae varua? E nafea vau e nehenehe ai e haaputapû i to ˈna aau?” E a faatano i ta outou haapiiraa i nia i to ˈna mau hinaaro. I te tahi taime, e ite paha outou i te faufaaraa ia horoa i te hoê hiˈoraa, te hoê faataaraa aore ra ia tuu i te hoê anairaa uiraa no te tauturu i te piahi ia taa maitai i te auraa o te hoê faahitiraa aore ra te hoê irava taa ê. (Neh. 8:8) Tera râ, a ape i te faaô mai i te tahi mau manaˈo aita e faufaa rahi roa no te taa maitai i te manaˈo tumu. E tauturu te hoê haamanaˈoraa poto i te hopea o te haapiiraa i te piahi ia haamanaˈo i te mau tuhaa faufaa.
5 Auê tatou i te oaoa ia faatupu te mau taata apî i te hotu no te haamaitai ia Iehova! (Phil. 1:11) No te tauturu ia ratou ia raea tera fa, e faaineine maitai anaˈe ia tatou i te mau taime atoa e faatere ai tatou i te hoê haapiiraa bibilia.