E faautua-maitai-hia te faaoromai
1 “E ora . . . outou i te mau tamau maite.” (Luka 21:19) Te faaite maitai ra teie mau parau ta Iesu i tohu no nia i “te hopea o teie nei ao” e ia taiva ore noa tatou, e ite iho â tatou e rave rahi tamataraa. Teie râ, mea na roto i te puai o Iehova e nehenehe ai tatou atoa e “mau papu e tae noa ˈtu i te hopea” e e “ora.”—Mat. 24:3, 13; Phil. 4:13, MN.
2 Peneiaˈe e tamataraa o te mau mahana atoa te hamani-ino-raa, te maˈi, te fifi moni e te hepohepo o te aau. Eiaha roa ˈtu râ tatou e haamoe e te imi ra Satani i te ofati i to tatou taiva ore ia Iehova. No reira, e mahana hau te mau mahana atoa e vai taiva ore ai tatou i to tatou Metua no te pahono i te aimârôraa a Tei aa. Auê ïa faautuaraa maitai ia ite e eita to tatou “roimata” i manii i te mau taime tamataraa e haamoehia! E mea faufaa roa te reira no Iehova; e faaoaoa to tatou taiva ore i to ˈna aau.—Sal. 56:8; Mas. 27:11.
3 E haamaitai te mau tamataraa ia tatou: E nehenehe te ati e haamatara i te hoê paruparu i roto i to tatou faaroo aore ra i to tatou iho huru, mai te teoteo aore ra te faaoromai ore. Eiaha e imi i te ape i te mau fifi aore ra i te faaore i te reira na roto i te mau ravea tu ore i te Bibilia, e pee anaˈe râ i te aˈoraa i roto i te Parau a te Atua: “E tuu atu . . . i ta te faaoromai tamau ra ohipa ia tia roa.” No te aha? No te mea ia faaoromai tatou i te mau tamataraa ma te taiva ore, e “maitai roa” tatou “eiaha ei hapa.” (Iak. 1:2-4) E tauturu te faaoromai ia tatou ia faahotu i te mau huru maitatai faufaa roa, mai te huru faito noa, te aumauiui e te aroha hamani maitai.—Roma 12:15.
4 Te faufaaraa o to tatou faaroo i tamatahia: Na roto i te faaoromairaa i te mau fifi, e noaa ia tatou te hoê faaroo i tamatahia te paari e tei rahi te maitai no te Atua. (Pet. 1, 1:6, 7) E tauturu taua faaroo ra ia tatou ia mau papu i roto i te mau tamataraa i mua nei. Hau atu â, e ite tatou i te farii maitai a te Atua, e e haapaari te reira i to tatou tiaturiraa o te riro ei mea mau roa no tatou.—Roma 5:3-5.
5 Ua haamahitihitihia te faautuaraa maitai roa ˈˈe ta te faaoromai e hopoi mai i roto i te Iakobo 1:12: “E ao to te taata e faaoromai i te ati, ua tia-anaˈe-hia mai hoi oia ra, e roaa ïa ia ˈna te korona ora.” No reira, ia vai aueue ore noa to tatou paieti ia Iehova ma te tiaturi e e faautua maitai rahi oia i “te feia i hinaaro ia ˈna ra.”