E nafea ia poro i te mau vahi tapihooraa
1. Eaha te tahi mau tuhaa maitai o te pororaa i te mau vahi tapihooraa?
1 Eita anei outou e hinaaro e poro i te hoê vahi e farii-maitai-noa-hia te mau ratere e tei te fare te rahiraa o te taata? E nehenehe te reira e tupu i roto i te tuhaa fenua iho a ta outou amuiraa. E nafea? Na roto ïa i te haereraa e hiˈo i te mau fare toa. E ite pinepine te feia e poro na te mau fare toa i te mau faahopearaa maitai.
2. E nafea ia faanaho i te pororaa i te mau vahi tapihooraa?
2 I roto i te tuhaa fenua a te tahi mau amuiraa, te vai atoa ra te mau vahi e fare toa anaˈe. E nehenehe te taeae haapao tuhaa fenua e faaineine i te mau tapura fenua taa ê no taua mau vahi ra. E haapapu-maitai-hia i nia i tera mau tapura tuhaa fenua atoa e fare toa to roto, e te farerei-taa-ê-hia ra te feia tapihoo. I roto i te tahi atu mau tuhaa fenua, e nehenehe te mau fare toa e porohia i te hoê â taime e te mau fare faaearaa. Mai te peu e a tahi ra outou a rave ai i taua ohipa ra, a haamata ïa i te poro na te tahi mau fare toa nainai.
3. Eaha te tauturu ia tatou ia ohipa maitai ia poro tatou na te mau fare toa?
3 A faaohipa i te hoê aparauraa ohie: Ia poro outou na te mau fare toa, a faanehenehe ia outou mai te huru e te haere ra outou i te hoê putuputuraa i te Piha a te Basileia. E mea tano atoa ia tiai i te hoê taime aita i rahi te taata i te fare toa. Mai te peu e e nehenehe, a tomo i te taime aita e taata hoohoo e tiai ra. A ani i te paraparau i te taata haapao aore ra te taata faatere. A haapoto noa e a faataa maitai. Eaha ta outou e nehenehe e parau?
4-6. Eaha ta tatou e nehenehe e parau ia poro tatou i te hoê taata haapao fare toa?
4 Ia paraparau outou i te taata haapao, e nehenehe outou e na ô atu: “No te mea e mea ohipa roa te feia tapihoo, e mea fifi ia farerei ia ratou i ǒ ratou, no reira matou e haere mai ai e hiˈo ia oe i ta oe vahi ohiparaa. Te faataa rahi ra ta matou mau vea i te mau mea e tupu ra.” I muri iho, a faahiti i te hoê manaˈo poto noa o te vea.
5 Aore ra e nehenehe outou e tamata i teie huru faaiteraa: “E rave rahi taata o te hinaaro nei e ite hau atu â no nia i te Bibilia, mea iti roa râ to ratou taime. Te faaite ra teie api parau i te hoê haapiiraa tamoni ore no te tauturu ia oe ia ite i te pahonoraa o ta oe mau uiraa bibilia.” I muri iho, a faaite i na api 4 e 5 o te api parau E hinaaro anei outou e ite hau atu â no nia i te Bibilia?
6 Mai te peu e e mea ohipa roa te taata haapao, e nehenehe outou e pûpû noa ˈtu i te hoê api parau ma te parau atu e: “E hoˈi mai au i te hoê taime aita oe e ohipa rahi ra. E hinaaro vau e ite i to oe manaˈo i teie api parau.”
7. E nafea tatou e atuatu ai i te anaanatae i te mau vahi tapihooraa?
7 E atuatu anaˈe i te anaanatae: O vai tei ite eita anei outou e faatere i te hoê haapiiraa bibilia i te hoê vahi tapihooraa? Ua vaiiho tamau te hoê pionie taa ê i te mau vea na te hoê taata tapihoo. A faaite ai te taata ra i to ˈna manaˈo anaanatae i ta ˈna i taio, ua faataa ˈtu te pionie e nafea te hoê haapiiraa bibilia e ravehia ˈi i nia i te buka rairai Titau. Ua haamatahia te haapiiraa i te vahi ohiparaa a taua taata ra. Ia au i te mau tupuraa, ua taotia te pionie i te haapiiraa taitahi 10 aore ra 15 minuti i te maoro. Ia tamau atoa tatou i te imi i te feia e au ma te poro i te mau vahi tapihooraa.