E te feia apî, a taio i te Parau a te Atua!
1 E taime o te mau fifi e faaotiraa faufaa te apîraa. I te mau mahana atoa, te faahepohia ra e rave rahi o outou te mau Kerisetiano apî ia ofati i te mau ture aveia a te Atua o te haerea. A haamata ˈi outou i te rave i ta outou iho mau faaotiraa no nia i te haapiiraa, te ohipa e te faaipoiporaa, ua faataa ê na ïa outou i ta outou mau fa pae varua e tia ˈi. Mea na reira noa e nehenehe ai outou e rave i te tahi atu mau faaotiraa ia hoona to outou oraraa. E tauturu te mau fa pae varua taa maitai ia outou ia ohipa ma te paari e ia manuïa. Na roto i te taioraa e te feruriruri-tamau-raa i te Parau a te Atua, e turaihia outou ia ora ia au i ta ˈna mau aˈoraa faaurua, e e hoona ta outou mau tutavaraa aratai-maitai-hia.—Ios. 1:8; Sal. 1:2, 3.
2 E nafea outou e faufaahia ˈi i te reira? Te faaitoito noa ra te ao a Satani ia rave i te ino. (Ioa. 1, 2:15, 16) Ua matau paha outou i te tahi mau hoa haapiiraa aore ra te tahi atu feia apî o to outou faito matahiti, i roohia i te ati no to ratou vaiihoraa i te tahi atu mau hoa ia faahema ia ratou. Maoti te peeraa i te mau aˈoraa bibilia e noaa ˈi ia outou te puai morare e pae varua no te patoi i te haerea hara. Hau atu â, e tauturu tera mau aˈoraa ia outou ia ape i te mau marei omoe a Satani. (Kor. 2, 2:11; Heb. 5:14) Ia haere outou na te eˈa o te Atua, e ite outou i te oaoa mau—oia hoi te oaoaraa i roto i to outou oraraa.—Sal. 119:1, 9, 11.
3 E hau aˈe te mau faaueraa tumu taraire o te Parau a te Atua i te paari taata nei. (Sal. 119:98-100) E tauturu te ite-maitai-raa i te mau faaueraa tumu bibilia e te feruriruriraa i te mau opuaraa faaitehia a te Atua ma te apitihia e te pure haavare ore, ia outou ia faatupu i te mau taairaa piri e te Atua ra o Iehova, te Tumu paari hope o te Bibilia. Te fafau ra oia e: “E haapii atu vau ia oe, e faaite au ia oe i ta oe eˈa ia haere ra; e aˈo atu vau ia oe, e ei nia ia oe tau mata vai ai.”—Sal. 32:8.
4 A faataa i te taime no te taio atu: Ua haamau te hoê potii Kerisetiano ei fa na ˈna e taio i te Bibilia taatoa, e ua oti te reira i roto hoê matahiti. Mea nafea to ˈna faufaaraahia? Te haamanaˈo ra oia e: “E mea rahi roa ta ˈu i haapii no nia ia Iehova—te mau mea o tei haafatata ˈtu â ia ˈu ia ˈna e o tei turai ia ˈu ia mǎtaˈu ia ˈna i te roaraa o to ˈu oraraa.” (Iak. 4:8) Ua taio anei outou i te Bibilia taatoa? Mai te peu e aita, no te aha e ore ai e haamau i te reira ei fa na outou? E haamaitai mau Iehova i ta outou mau tutavaraa, e e ooti outou i te mau haamaitairaa rahi.