A tauturu i te feia ‘aau farii e tano’
1. O vai ta Iehova e faatae nei ia ˈna ra i to tatou nei tau?
1 E huru feruriraa to te taata taitahi tei aˈa maitai i roto i to ˈna aau taipe. (Mat. 12:35) Te faahiti ra te Bibilia i te taata ‘tamaˈi tei opuahia e to ˈna aau.’ (Sal. 55:21) E feia “riri uˈana” te tahi atu. (Mas. 29:22) Tera râ, te vai atoa ra te feia “[aau farii e tano] no te ora mure ore.” (Ohi. 13:48; MN) Te faatae nei Iehova ia ˈna ra i teie mahana i tera mau taata aau farii e tano. (Hag. 2:7) E nafea ia tauturu ia ratou ia riro ei feia haamori ia Iehova?
2. Eaha te titauhia no te rave i ta tatou ohipa e faariro i te taata ei pǐpǐ?
2 A hoˈi maite faahou: E mea faufaa roa ia noaa te feruriraa maitai i nia i te mau farerei-faahou-raa no te rave i ta tatou ohipa e faariro i te taata ei pǐpǐ. (Mat. 28:19, 20) Te atuatu oioi ra anei tatou i te anaanatae i faatupuhia? Te hoˈi faahou ra anei tatou e farerei i te feia atoa o tei farii i te hoê papai aore ra o tei anaanatae i te parau apî maitai? Te tutava ra anei tatou ma te tuutuu ore i te tauturu ia ratou ia tupu i te pae varua? I te mea e e ati to mua i te mau taata, e titauhia ia imi tatou i te atuatu i te anaanatae atoa ta tatou e farerei.
3. Eaha te titauhia ia rave tatou i muri aˈe i te aparauraa e te hoê taata i roto i te taviniraa?
3 A haamanaˈo noa ˈi tatou i te aparauraa, e rave anaˈe i te taime no te papai i te iˈoa e te vahi nohoraa o te taata ta tatou i paraparau. E papai anaˈe i te tumu parau i aparauhia, i te mau irava i taiohia, e te mau papai i vaiihohia. I muri iho, e tutava anaˈe i te hoˈi faahou i te neheneheraa iho â.
4. E nafea ia rave i te mau farerei-faahou-raa manuïa?
4 E rave i te hoê farerei-faahou-raa: Ia rave tatou i te hoê farerei-faahou-raa, e faaite anaˈe i te huru mahanahana e te auhoa e te anaanatae haavare ore i te taata. Ia ohie noa te aparauraa e ia niuhia i nia i te Bibilia. E faaineine anaˈe i te hoê tumu parau bibilia anaanatae, e hou a haere ai, e tuu anaˈe i te hoê uiraa e pahonohia i muri iho. Mai te peu e e faahiti te taata i te mau manaˈo e ere no roto i te Bibilia, e ape anaˈe i te paraparau faufaa ore atu. E tutava anaˈe râ i te patu i nia i te mea e tu ai to tatou manaˈo.—Kol. 4:6.
5. Eaha te mau tutavaraa ta te hoê pionie i rave, e eaha te mau faahopearaa?
5 E titauhia ia tutava no te rave i te mau farerei-faahou-raa, e hoona râ. Ua faaoti te hoê pionie Tapone e rave hau atu â i te mau farerei-faahou-raa i te mau avaˈe atoa. Ua haamata oia i te tapao i te feia atoa ta ˈna i farerei i roto i te pororaa i tera fare i tera fare e te hoˈi faahou e hiˈo ia ratou i te hebedoma i muri iho. Ua faaineine maite o ˈna i ta ˈna e parau, ma te tiaturi roa i te poroi ta ˈna e afai atu. I te hoê o tera mau farereiraa, ua haamata o ˈna i te hoê haapiiraa e te hoê taata o tei parau ia ˈna e: “I patoi noa na vau i te mau Ite e tae roa i teie nei. A tahi ra vau a faaroo ai ia outou.” Ua horoa mai te tuutuu ore î i te here o teie pionie i te mau faahopearaa. I te hopea avaˈe, hoê ahuru haapiiraa bibilia ta ˈna.
6. No te aha tatou e tamau ai i te rave i te mau farerei-faahou-raa?
6 E taui noa te tupuraa o te mau taata. (Kor. 1, 7:31) E pinepine e titauhia e rave rahi tamataraa hou a farerei ai i te hoê taata i to ˈna fare. Ma te rave maite i te mau farerei-faahou-raa, e tauturu tatou i “te feia aau farii e tano” ia haere na te eˈa e aratai i te ora mure ore.—Mat. 7:13, 14.