E turai te mau tairururaa mataeinaa e te mau tairururaa nunaa rau ia tatou ia faahanahana i te Atua!
Ua horoa te mau tairururaa mataeinaa e te mau tairururaa nunaa rau “A faahanahana i te Atua” tei tupu e tae roa mai i teie nei i te hoê faaiteraa rahi. Ua faahanahana teie mau tupuraa teotaratia faufaa i te iˈoa o Iehova e ua faaaravihi atu â ia tatou no te “ho atu ia Iehova i te hanahana e au i to ˈna ra iˈoa.” (Sal. 96:8) Oia mau, e mea tia ia faahanahanahia oia no ta ˈna poieteraa nehenehe mau o te faaite ra i to ˈna mau ateriputi faahiahia roa.—Ioba 37:14; Apo. 4:11.
A faaohipa ˈi outou i te mau uiraa i muri nei e ta outou iho mau tapaopaoraa, a faaineine e a apiti atu i te haamanaˈoraa o te porotarama tairururaa o te ravehia i te hebedoma o te 20 no Atopa.
1. E nafea te poieteraa hauti ore e faaite ai i te hanahana o te Atua, e e nafea te reira e taa ê ai i ta te taata arueraa ia ˈna? (Sal. 19:1-3; “Te faaite ra te poieteraa i te hanahana o te Atua”)
2. Eaha te tupuraa mau i teie nei ta te faahuru-ê-raa e faahohoˈa ra, e e nafea te mau Kerisetiano i teie tau e faaitoitohia ˈi e taua tupuraa ra? (Oreroraa parau tumu, “E faaitoito te mau orama parau tohu hanahana ia tatou!”)
3. E nafea e faahotu ai i te huru haehaa faaitehia e te peropheta Daniela, e e nafea tatou e maitaihia ˈi i te na reiraraa? (Dan. 9:2, 5; 10:11, 12; “E faaite o Iehova i to ˈna hanahana i te feia haehaa”)
4. (a) Eaha na tuhaa e toru no nia i te haavaraa a te Atua ta tatou e nehenehe e haapii mai i roto i te parau tohu a Amosa? (Amo. 1:3, 11, 13; 9:2-4, 8, 14) (b) Eaha te haapiiraa e au ia faaohipa ta te mau Ite no Iehova i teie tau e nehenehe e huti mai i roto i te hiˈoraa faaararaa o te Amosa 2:12? (“Te parau tohu a Amosa—ta ˈna poroi no to tatou tau”)
5. (a) Eaha te mau fifi atâta o te inu-hua-raa i te ava, noa ˈtu e eita te hoê taata e taero? (b) E nafea te fifi o te inu-hua-raa i te ava e nehenehe ai e faatitiaifarohia? (Mar. 9:43; Eph. 5:18; “E ape anaˈe i te marei o te inu-hua-raa i te ava”)
6. E nafea outou e faufaahia ˈi i te papai apî ‘Voyez le bon pays’? (“‘Te fenua maitai’—te hoê hiˈoraa o te paradaiso”)
7. “E faaite tatou mai te hiˈo i te hanahana o Iehova” i roto i teihea na ravea e toru? (Kor. 2, 3:18; “E faaite tatou mai te hiˈo i te hanahana o Iehova”)
8. Eaha te tumu o te riri tia ore, e na te aha e tauturu ia tatou ia tapea i to tatou hapa ore noa ˈtu e e farerei tatou i taua riri ra? (Sal. 109:1-3; “Ririhia ma te tumu ore”)
9. Eaha te manaˈo e au i to te Mesia no nia i te rahi hau ê, e e nafea te hoê taata e nehenehe ai e ite e e titauhia ia faahotu atu â oia i tera manaˈo? (Mat. 20:20-26; “E faahotu anaˈe i te manaˈo e au i to te Mesia no nia i te rahi hau ê”)
10. Eaha te nehenehe e tauturu ia tatou ia vai itoito noa i te pae varua noa ˈtu te rohirohi i te pae tino? (“Ua rohirohi aita râ i toaruaru”)
11. Eaha te tahi mau ravea e faaohipahia ra e Satani no te haavare, e eaha te pahonoraa bibilia tano i te mau tamataraa i te haapiˈo i to tatou faaroo? (Ioa. 10:5; “E ara anaˈe i ‘to te taata ěê reo’”)
12. (a) E nafea te mau metua e nehenehe ai e pee i te hiˈoraa o Iesu mai tei faahitihia i roto i te Mar. 10:14, 16? (b) Eaha ta outou i au no nia i te buka apî Écoute le grand Enseignant? (“E tuhaa faufaa roa ta tatou mau tamarii”)
13. E nafea te feia apî e arue ai ia Iehova? (Tim. 1, 4:12; “Te arue nei te feia apî ia Iehova”)
14. Eaha te mau tuhaa faahiahia roa o te darama “E poro anaˈe ma te mǎtaˈu ore noa ˈtu te patoiraa” ta outou e haamanaˈo ra?
15. E nafea tatou e nehenehe ai e pee i te hiˈoraa vaiihohia mai (a) e Petero raua Ioane? (Ohi. 4:10) (b) e Setephano? (Ohi. 7:2, 52, 53) (c) e te amuiraa Kerisetiano no te senekele matamua? (Ohi. 9:31; darama e te oreroraa parau “E faaite anaˈe i te parau apî maitai ‘aore e mahana tuua’”)
16. (a) Ua faaoti tatou e faahanahana i te Atua i roto i teihea mau tuhaa? (b) Eaha te mea e nehenehe ai tatou e papu ia faaohipa tatou i ta tatou i haapii mai i te mau tairururaa “A faahanahana i te Atua”? (Ioa. 15:9, 10, 16; “‘Ia rahi to outou hotu’ ei faahanahanaraa ia Iehova”)
Ma te feruri hohonu i te haapiiraa pae varua maitai roa i vauvauhia i te tairururaa, e turaihia tatou ia faaohipa i ta tatou i haapii mai. (Phil. 4:8, 9) E haapaari te reira i ta tatou faaotiraa ‘e rave i te mau mea atoa ma te haamaitai i te Atua.’—Kor. 1, 10:31.