E atuatu anaˈe i ta tatou vahi haamoriraa
1. Eaha te fa o te mau Piha a te Basileia?
1 Ua hau atu i te 94 000 amuiraa a te mau Ite no Iehova na te ao nei. Te putuputu nei te rahiraa o ratou i roto i te hoê Piha a te Basileia, o te faaohipahia ei pu no te haamoriraa viivii ore o te fenua, no te haapii i te Bibilia e no te farerei i te tahi atu mau Kerisetiano.
2. No te aha e mea faufaa ˈi ia mâ e ia naho noa te Piha a te Basileia?
2 Te hoê porotarama tamâraa tamau: Te mau tutavaraa i ravehia no te atuatu i te Piha a te Basileia, e tuhaa faufaa roa ïa o ta tatou taviniraa moˈa. Te na ô ra te buka Notre ministère i te api 61 e: “E mea tia ia hiˈo te mau taeae ei fanaˈoraa taa ê i te ravea e pûpûhia ra na ratou no te apiti atu i te atuaturaa i te reira eiaha noa i te pae moni, ma te horoa atoa râ i te rima tauturu no te rave i te mau ohipa atoa e titauhia ia vai mâ, ia naho e ia vai maitai noa te reira. E mea tia ia faahohoˈa maitai te Piha a te Basileia, i roto e i rapaeau, i te faanahonahoraa a Iehova.” I te mea e e faaohipahia te Piha a te Basileia e rave rahi taime i te hebedoma, e titauhia ia tamâ e ia atuatu tamau atu. E pinepine, na te mau melo o te (mau) amuiraa e putuputu mai i roto i te piha e haapao i te reira. Mai te feia i te tau bibilia, e titauhia ia tutava te mau tavini a Iehova i teie mahana i te ‘rave e te faaetaeta faahou’ i ta ratou vahi haamoriraa.—Par. 2, 34:10.
3. E nafea te tamâraa o te Piha a te Basileia e faanahohia ˈi, e o vai te nehenehe e apiti atu?
3 Ia piahia te porotarama tamâraa tahebedoma o te Piha a te Basileia i nia i te iri e tia ˈi. E tamâ te mau haapiiraa buka atoa i te piha te tahi i muri aˈe te tahi, ma te pee i te tapura o te mau ohipa e rave. E titauhia ia apiti atu te feia atoa e nehenehe i te fanaˈoraa taa ê e tamâ e e atuatu i te Piha a te Basileia i te mau hebedoma atoa. I raro aˈe i te aratairaa a te mau metua, e nehenehe atoa te mau tamarii e apiti atu, e haapii te reira ia ratou ia faaite i te mauruuru no teie fanaˈoraa taa ê. Ia faaohipa iho â râ hau atu i te hoê amuiraa i te piha, mea faufaa roa te haa-amui-maitai-raa ia ore te haapaoraa i teie tuhaa faufaa o ta tatou haamoriraa ia riro ei hopoia na te tahi pae noa.
4. Eaha te titauhia ia rave ia ite te amuiraa e nafea ia tamâ i te Piha a te Basileia?
4 E nehenehe te hoê tapura o te mau ohipa e rave e piahia i te vairaa tauihaa. E faataa taua tapura ra i te mau ohipa e mea tia ia ravehia i te mau hebedoma atoa, mai te purumuraa, te horoiraa i te mau haamaramarama, te tahitahiraa i te repo puehu i nia i te mau iri hooraa, te faarueraa i te mau pehu no roto i te mau farii, te taahuraa, e te tamâraa i te mau hiˈo. Te vai ra te tahi mau ohipa e nehenehe e ravehia ma te faataime, mai te faaanaanaraa i te mau tauihaa raau atoa e te tamâ-maitai-raa i te mau parahiraa, te mau paruru, e te mau mori uira. Ia faanahohia te mau taoˈa tamâraa i te hoê vahi eita e raeahia e te mau tamarii e ia tapao-maitai-hia te reira e tia ˈi. Ia faataa-poto-hia e nafea ia faaohipa i te reira e tia ˈi.
5. Eaha te faufaaraa o te panaˈonaˈo ore, e eaha te mau tuhaa e mea tia ia hiˈopoa-tamau-hia? (A hiˈo i te tumu parau tarenihia i te api 4.)
5 E mea faufaa roa te panaˈonaˈo ore i te Piha a te Basileia. (Deut. 22:8) No nia i te reira, te horoa ra te tumu parau tarenihia i te api 4 i te hoê tapura o te mau tuhaa e titauhia ia hiˈopoa tamau no te ape i te mau ati.
6. E nafea te atuaturaa o te Piha a te Basileia e faanahohia ˈi?
6 Te atuaturaa i te Piha a te Basileia: Na te tino matahiapo te hopoia e faanaho i te atuaturaa o te Piha a te Basileia. E pinepine, e maitihia te hoê matahiapo aore ra te hoê tavini tauturu ia haapao i te ohipa. E faanaho oia i te tereraa ohipa o te Piha a te Basileia i tera e tera mahana, ma te ara e ia vai mâ, ia vai maitai te reira e ia ravai te mau tauihaa e hinaarohia. Mea faufaa roa ia ara e aita e tupuraa atâta i roto e e ati aˈe i te piha. Ia faaohipa tau amuiraa i te hoê â piha, e nomino te mau tino matahiapo i te hoê tomite faatere o te faanaho i te atuaturaa o te piha e te aua. E ohipa taua tomite ra i raro aˈe i te aratairaa a te mau tino matahiapo.
7. (a) Eaha te ravehia i te mau matahiti atoa ia vai maitai noa te Piha a te Basileia? (b) Eaha te haapao-tamau-hia? (A hiˈo i te tumu parau tarenihia i te api 5.)
7 E hiˈopoa-maite-hia te Piha a te Basileia i te mau matahiti atoa. E rave te mau matahiapo i muri aˈe i te mau faanahoraa ia atuatu-maitai-hia te mau tuhaa atoa e titauhia. E nehenehe e ani i te feia poro ia apiti atu i roto i te mau tataîraa e te atuaturaa e titauhia. Ia aupuru maite e ia atuatu oioi te taatoaraa i te mau tuhaa atoa e titauhia e tia ˈi.
8. Afea te mau matahiapo e nehenehe ai e faaara i te Tomite paturaa no te fenua no nia i te atuaturaa?
8 Mai te peu e e hinaaro te mau matahiapo i te aˈoraa aore ra i te tauturu no nia i te atuaturaa i te Piha a te Basileia, e nehenehe ratou e faaara ˈtu i te Tomite paturaa no te fenua. Ei hiˈoraa, mai te atuaturaa i te vauvau tahua, te hiˈopoaraa i te mau matini faatoetoeraa mataˈi, aore ra te faaafaroraa i te mau fifi o te haumi.
9. Eaha te tereraa e mea tia ia pee ia hinaarohia e ani i te tauturu a te hoê taiete?
9 Te faaohiparaa paari i te faufaa a te amuiraa: Na te mau rima tauturu e rave ra i te rahiraa o te ohipa i roto i te Piha a te Basileia e i rapaeau. Ta ratou mau tutavaraa miimii ore, e faaiteraa faahiahia ïa o te here e e tauturu rahi no te faaitiraa mai i te mau haamâuˈaraa. Mai te peu e e titauhia ia ani i te hoê tamuta aore ra taiete no te rave i te tahi ohipa, mai te tinairaa i te mau iore, e imi ïa te mau matahiapo i te taiete mâmâ roa ˈˈe. Te auraa, e papai ratou na mua i te hoê faataaraa tatara-maitai-hia o te ohipa e rave e te mau tauihaa e hinaarohia. E horoahia ˈtu te reira i te tahi mau taiete, ia nehenehe ratou e pahono i te aniraa i nia i te hoê â niu. Ua tae anaˈe mai te mau pahonoraa papaihia a te mau taiete, e nehenehe ïa te mau matahiapo e maiti i te taiete mâmâ roa ˈˈe. E peehia taua huru raveraa ra noa ˈtu e pûpû mai te hoê taeae ia ˈna no te rave i te ohipa aore ra no te horoa i te mau tauihaa hinaarohia no te tahi noa tino moni.
10. Eaha tei ravehia ia papu e te faaohipa-maitai-hia ra te faufaa a te amuiraa?
10 E rave atoa te mau matahiapo i te mau taahiraa e tano no te fanaˈo i te faaoreraa tute i nia i te fare e te hooraa i te vahi e nehenehe ai. Na te mau matahiapo e haapao i te faaohipa-maitai-raa i te faufaa a te amuiraa.
11. Eaha te rave mai te peu e e titauhia te mau ohipa atuaturaa e te faaapîraa rarahi?
11 Te mau ohipa atuaturaa e te faaapîraa rarahi: Ia hiˈo te Tomite faatere e mea tia ia ravehia te mau ohipa rarahi o tei taaihia i te faaohiparaa aore ra i te atuaturaa i te piha, e ani oia i te manaˈo o te mau tino matahiapo. Mai te peu e e tano ia ravehia teie mau ohipa atuaturaa aore ra faaapîraa, aore ra e hinaarohia te hoê tauturu no rapae mai i te (mau) amuiraa e putuputu ra i roto i te piha, e faaara ïa te mau matahiapo i te mau melo o te Tomite paturaa no te fenua. E horoa teie mau taeae ite e te aravihi i te mau manaˈo tauturu faufaa e e aratai ratou i te ohipa. Mai te peu e e titauhia te hoê haamâuˈaraa rahi, e mea tia ïa ia roaa mai te tino moni tia e ia faaite i te hoê faaotiraa i te mau amuiraa.—A hiˈo i Ta tatou taviniraa i te Basileia no Fepuare 1994, Pahonoraa i ta outou mau uiraa.
12. E nafea tatou e nehenehe ai e faaite i to tatou mauruuru no te fanaˈoraa taa ê e haere i te mau putuputuraa i te Piha a te Basileia?
12 Te haafaufaa rahi nei tatou i ta tatou fanaˈoraa taa ê e putuputu i te Piha a te Basileia. Eita roa ˈtu tatou e hinaaro e mairi i ta tatou mau putuputuraa aore ra e haafaufaa ore i te reira. E nehenehe tatou paatoa e haa amui ia manuïa teie mau faanahoraa i ravehia no te faaitoito ia tatou ia apiti hua ˈtu i roto i te atuaturaa i te Piha a te Basileia. E arue te reira i te haamoriraa viivii ore e e faahanahana i te iˈoa o Iehova. Ia faaoti papu tatou e atuatu i ta tatou vahi haamoriraa.
[Tumu parau tarenihia i te api 4]
Haapotoraa no te panaˈonaˈo ore
◻ E mea tia ia naea-ohie-hia te mau tupohe auahi; ia hiˈopoahia te reira i te mau matahiti atoa e tia ˈi.
◻ Ia hiˈopoahia te mau ravea tupohe auahi pata ohie atoa ia au i te ture o te fenua nei e tia ˈi.
◻ E mea tia ia faataahia, ia turama-maitai-hia e ia naea-ohie-hia te mau uputa hororaa e te mau eˈa; e mea tia ia faaetaeta-maitai-hia te mau paruru.
◻ E mea tia ia vai mâ e ia naho te mau vairaa tauihaa, te mau vahi haumitiraa, e te mau vahi tauiraa ahu; eiaha roa ˈtu ia itehia te mau taoˈa, te mau tauihaa a te taata, e te mau pehu e pau haere noa i te auahi.
◻ Ia hiˈopoahia e ia tamâ-tamau-hia te tafare e te mau taheraa pape e tia ˈi.
◻ Ia turamahia te mau eˈa haereraa taata e te mau vairaa pereoo e ia ore ia apǐ i te tahi mea a hee aore ra a topa ˈtu ai te taata.
◻ Ia hiˈopoahia e ia atuatu-maitai-hia te mau ravea tamauraa uira e te haapuvaivairaa mataˈi e tia ˈi.
◻ E mea tia ia pate-vitiviti-hia te mau apoo atoa no te arai i te mau fifi o te haumi.
◻ Ia ponaohia te mau piha aita anaˈe e taata faahou i roto e tia ˈi.
[Tumu parau tarenihia i te api 5]
Atuaturaa i te piha e te aua
◻ Rapaeau: E mea maitai anei te tafare, te papai, te peni, te mau haamaramarama, te iri faaiteraa o te Piha a te Basileia?
◻ Mahora: Ua atuatu-maitai-hia anei te mahora? Mea maitai anei te mau eˈa haereraa taata, te aua, e te mau vairaa pereoo?
◻ Roto: Mea au maitai anei te mau vauvau tahua, te mau paruru, te mau parahiraa, te mau tamauraa uira e tuio pape, te papai, te mau paˈepaˈe vairaa buka, e te mau vahi tauiraa ahu?
◻ Tauihaa: E tere maitai anei te mori, te ravea haapurororaa, te haapuvaivairaa e te faatoetoeraa mataˈi?
◻ Vahi haumitiraa: E mea mâ e e haere maitai anei te reira?