E faaite anaˈe i te iˈoa o te Atua
1. Eaha te huru o te mau taata ia ite ratou i te iˈoa o te Atua?
1 Eaha to outou huru i to outou iteraa i te iˈoa o te Atua? E rave rahi o tei faaite i te hoê â huru e to teie vahine o tei na ô e: “I to ˈu iteraa i te iˈoa o te Atua i te taime matamua i roto i te Bibilia, ua taˈi au. Ua putapû roa vau i te taaraa e e nehenehe au e ite e e faaohipa mau i te iˈoa iho o te Atua.” I roto i to ˈna tupuraa, mea faufaa roa i te iteraahia mai e ana te iˈoa o te Atua: ua tauturu te reira ia ˈna ia hiˈo i te Atua ei ihotaata e ia faatupu i te mau taairaa e o ˈna.
2. No te aha e mea tia ˈi ia ru tatou i te haapii i to tatou taata-tupu no nia ia Iehova?
2 No te aha e faaite ai? Ua taaihia te iˈoa o te Atua i to ˈna mau huru maitatai, i ta ˈna mau opuaraa e ta ˈna mau ohipa. To ˈna atoa auraa, o te ora ïa. ‘O te tiaoro atoa i te iˈoa o Iehova ra, e hope roa ïa i te ora,’ ta te aposetolo Paulo ïa i papai. “Eaha ra te taata nei e tia ˈi ia tiaoro atu ia ˈna,” ta ˈna ïa i haaferuri atu, mai te peu e eita ratou e haapii na mua no nia ia Iehova e e faatupu i te faaroo ia ˈna? No reira, e mea tia ia ru te mau Kerisetiano i te faaite i te iˈoa o te Atua e te mau mea atoa i taaihia i te reira. (Roma 10:13, 14) Te vai nei râ te hoê tumu faufaa roa ˈtu â e faaite ai i te iˈoa o te Atua.
3. Eaha te tumu matamua tatou e poro ai?
3 I te mau matahiti 1920, ia au i te maramarama o te mau Papai, ua taa i te nunaa o te Atua te tumu parau rahi no nia i te faatiaraa i te mana arii o Iehova e te faaraaraa i to ˈna iˈoa. Na mua ˈˈe te Atua e haamou ai i te feia ino no te tamâ i te faainoraa i faataehia i nia i to ˈna iˈoa, e mea tia ia ‘faaitehia i te fenua atoa,’ te parau mau no nia ia ˈna. (Isa. 12:4, 5; Ezek. 38:23) No reira, e poro tatou na mua roa no te arue ia Iehova i mua i te taata e no te faaraa i to ˈna iˈoa i mua i te huitaata atoa. (Heb. 13:15) E turai to tatou here i te Atua e i to tatou taata-tupu ia rave faahope roa i te ohipa ta te Atua i faaue mai ia tatou.
4. Mea nafea te iˈoa o te Atua i te taai-roa-raahia i te mau Ite no Iehova?
4 ‘Te hoê pae taata no to ˈna iˈoa’: I te matahiti 1931, ua farii tatou i te iˈoa Ite no Iehova. (Isa. 43:10) Mai reira mai, te faaite nei te nunaa o te Atua i to ˈna iˈoa e tae roa i te hoê faito a na ô ai te buka ra Prédicateurs, i te api 124 e: “Na te ao atoa, e faaau-oioi-hia te hoê o tei matau i te faaohipa i te iˈoa o Iehova ei Ite no Iehova.” Te na reira-atoa-hia nei no nia ia outou? E mea tia ia turai to tatou mauruuru no te hamani maitai o te Atua ia tatou ia ‘arue i to ˈna iˈoa,’ ia paraparau no nia ia ˈna i te mau taime tano atoa.—Sal. 20:7; 145:1, 2, 7.
5. Eaha te taairaa o to tatou haerea i te amoraa i te iˈoa o te Atua?
5 E mea tia ia paturu tatou, ‘te hoê pae taata no to ˈna iˈoa,’ i te mau ture aveia a te Atua. (Ohi. 15:14; Tim. 2, 2:19) Te mea matamua ta te taata e ite pinepine i nia i te mau Ite no Iehova, o to ratou ïa haerea maitai. (Pet. 1, 2:12) Eiaha tatou e faaino i te iˈoa o te Atua ma te haafaufaa ore i ta ˈna mau faaueraa tumu aore ra ma te tuu i ta ˈna haamoriraa i te piti o te parahiraa. (Lev. 22:31, 32; Mal. 1:6-8, 12-14) E faaite râ tatou na roto i to tatou huru oraraa e te poihere nei tatou i te fanaˈoraa taa ê e amo i te iˈoa o te Atua.
6. Eaha ta tatou fanaˈoraa taa ê i teie mahana e a muri noa ˈtu?
6 I teie mahana, te ite nei tatou i te tupuraa o te mau parau a Iehova: ‘E rahi to ˈu nei iˈoa i te mau fenua nei, mai te hitiraa mai o te mahana, e tae noa ˈtu i to ˈna mairiraa.’ (Mal. 1:11) E tamau anaˈe ïa i te faaite i te parau mau no nia ia Iehova e i te ‘haamaitai i to ˈna ra iˈoa moˈa e a muri noa ˈtu.’—Sal. 145:21.