E tino paruparu, e mea hotu râ

¹ Noa ˈtu e e maˈi paruparu to outou mai te mau Ite no Iehova e rave rahi, e nehenehe ta outou taviniraa e hotu. Oia mau, e nehenehe to outou tupuraa e pûpû atu i te mau ravea taa ê no te horoa i te faaiteraa e no te faaitoito i te tahi atu.

² Te horoaraa i te faaiteraa: Te haa rahi nei te feia tino paruparu e rave rahi i roto i te taviniraa. Ei hiˈoraa, noa ˈtu e e mea fifi roa na ˈna ia hahaere e ia paraparau i muri aˈe i to ˈna tâpûraahia, ua ite te hoê tuahine e e nehenehe ta ˈna e faaite i te mau vea mai te peu e e tapea ta ˈna tane i te pereoo i te hoê aroâ taata. I te hoê mahana, ua vaiiho o ˈna e 80 i roto e piti noa hora. Hau atu â, no to outou tupuraa e nehenehe paha outou e farerei i te mau taata e mea fifi ia farerei. Mai te peu e e mai te reira, a faariro atu ei tuhaa fenua na outou.

³ E nehenehe ta outou pororaa e hotu. E nehenehe te mau taata e anaanatae i te poroi o te Basileia ia ite ratou i to outou hinaaro mau e te mana maitai o te parau mau bibilia i nia ia outou. Hau atu â, ia farerei outou i te mau taata i roto i te mauiui, e nehenehe to outou iho tupuraa e tamǎrû ia ratou na roto i te Parau a te Atua.—Kor. 2, 1:4.

⁴ Te haapuairaa ia vetahi ê: Aita anei outou i faaitoitohia e te aamu o Laurel Nisbet, o tei ora noa maoti te hoê mahaha auri e 37 matahiti i te maoro, o tei tauturu râ 17 taata ia roaa te ite mau o te parau mau bibilia? E nehenehe atoa to outou hiˈoraa e turai i te tahi atu mau Kerisetiano ia haa i roto i te taviniraa a Iehova.—g93-F 22/1 api 18-21.

⁵ Noa ˈtu e e haafifi te maˈi paruparu ia outou ia poro rahi mai ta outou e hinaaro, e nehenehe outou e haapuai ia vetahi ê. Ua na ô te hoê taeae e: “Ua itea ia ˈu e e nehenehe te hoê taata tino paruparu roa e riro ei tauturu no te tahi atu. E au mâua ta ˈu vahine i te hoê tutau no te mau melo rau o ta mâua amuiraa. No to mâua tupuraa, tei ǒ nei noâ mâua, ua ineine noa.” Oia mau, te taahia ˈtu ra e i te tahi taime e haafifi to outou maˈi paruparu ia outou ia rave i te mau ohipa ia au i to outou itoito rahi, tera râ e nehenehe outou e apiti ma te itoito i te taviniraa maoti te tauturu. No reira, ia hinaaro outou i te tauturu, a faaara ˈtu i te mau matahiapo aore ra i te tahi atu mau taeae e tuahine o ta outou amuiraa.

⁶ Te ite maira Iehova i te mau mea atoa ta outou e rave ra no te tavini ia ˈna e e mea au na ˈna ta outou ohipa e rave ra ma to outou nephe atoa. (Sal. 139:1-4) Mai te peu e e tiaturi outou ia ˈna, e horoa ˈtu o ˈna i te puai ia hotu e ia hoona ta outou taviniraa.—Kor. 2, 12:7-10.