E faaara anaˈe i te anaanatae maoti te mau parau apî
1 E hinaaro anei outou i te hoê haapueraa manaˈo maitatai e ore e pau ia nehenehe outou e faaapî i ta outou taviniraa e e faaara i te anaanatae o te taata no te poroi o te Bibilia? No reira, a haamata i te tahi mau aparauraa ma te faahiti i te mau parau apî na te ao nei aore ra no te fenua iho. A rave mai i te tahi mau tupuraa o te fenua iho e o te mau hau aore ra te tahi mau parau apî na te mau nunaa rau. E tauiui noa te mau parau apî. (Kor. 1, 7:31) E rave anaˈe i te tahi mau hiˈoraa.
2 E haapeapea rahi te mau fifi i te pae faanavairaa faufaa e te hoo o te oraraa i te taata. E nehenehe ïa tatou e parau e:
◼ “Ua faaroo anei oe i te mau parau apî e te maraa faahou ra te moni o te [a faaite i te maa]?” E nehenehe atoa tatou e paraparau no nia i te ereraa i te ohipa mai te peu e ua tihati te hoê taiete rahi e rave rahi rave ohipa. Ia au i te huru tupuraa ta tatou e hinaaro ra e horoa i te aparauraa, i muri iho, e ui anaˈe hoê o teie mau uiraa: “Ua uiui anei oe no te aha mea fifi ia noaa mai te hoê imiraa moni?” aore ra “Te manaˈo ra anei oe e mea fifi noa ia ravai te oraraa?”
3 E nehenehe atoa tatou e paraparau no nia i te haavîraa uˈana, i te fare aore ra i te fare haapiiraa. Ei hiˈoraa, e ui anaˈe e:
◼ “Ua taio anei oe i roto i te vea e [a faaite i te hoê ohipa i tupu i te fenua iho]?” E ui anaˈe i muri iho e: “Ia manaˈo oe, no te aha i rahi ai te haavîraa uˈana i roto i te ao?” aore ra: “Te manaˈo ra anei oe e e parahi hau noa tatou i te hoê mahana?”
4 Te mau vai pue ino mau, te mau aueueraa fenua aore ra te mau arepurepu tivila i te mau vahi rau o te ao nei, e mau tumu parau atoa o te faaara i te anaanatae. No te aha e ore ai e ui:
◼ “O te Atua anei te tumu o te [a faaite i te hoê ati natura]?” E nehenehe atoa tatou e paraparau no nia i te mau arepurepu tivila hopea nei e e parau e: “Mai te peu e te hinaaro ra te mau taata atoa i te hau, no te aha mea fifi roa ia haamau i te reira?”
5 Ia haapao maite tatou i te mau tupuraa o te nehenehe e parauhia ei omuaraa parau. E itehia te tahi mau manaˈo tauturu i raro aˈe i te tumu parau ra “Actualité” i te mau api 9 e 10 o te buka ra Comment raisonner. Teie râ, eiaha tatou e turu i te mau tumu parau politita aore ra totiale. E huti anaˈe i te ara-maite-raa i nia i te mau Papai e e faataa anaˈe e o te Basileia te ravea otahi tamau no te mau fifi o te huitaata nei.