Ua ineine anei oe i te faatanotano?
1. I te mea e e tauiui teie nei ao, eaha ïa te faatanotano?
1 Ua faaau te Bibilia i teie nei ao i te hoê tahua e tauiui te hohoˈa e te taata hauti. E titauhia ïa ia faatanotano i ta tatou mau ravea pororaa, porotarama e faaiteraa. Ua ineine anei oe i te na reira?
2. No te pee i te faanahonahoraa, no te aha e mea tia ˈi ia faatanotano?
2 Ta oe mau ravea pororaa: I te taime matamua a tono ai Iesu i ta ˈna mau pǐpǐ e poro, ua parau atu oia eiaha e hopoi i te pute maa aore ra moni. (Mat. 10:9, 10) No te fifi râ ta ratou e faaruru e ia porohia te tahi atu tuhaa fenua, ua taui oia i taua aratairaa ra. (Luka 22:36) Ua rave iho â ïa te amuiraa Kerisetiano i te mau faatanotanoraa. I te mau matahiti i mairi, ia au i te tau, e rave rau ravea pororaa ta te faanahonahoraa a Iehova i faaohipa mai te mau tareta faaiteraa, te ratio e te mau pereoo haapurororaa. I teie tau, mea varavara te taata i te fare, taa ê atu i te pororaa na te mau fare, te faaitoitohia ra ia poro i te vahi taata e ma te faanaho-ore-hia. Ia ore te taata i te fare, ia na reira ïa i te ahiahi. Te faatanotano maira ta Iehova pereoo i te raˈi, e pee anei oe i te reira?—Ezk. 1:20, 21.
3. E maitai atu â te pororaa ia faatanotano tatou i te faaiteraa, e nafea?
3 Ta oe faaiteraa: Eaha ta te taata e haapeapea ra? Te faanavairaa faufaa anei? Te utuafare anei? Te tamaˈi anei? Ma te ite i te mau fifi e tupu ra e faaineine ai oe i te faaiteraa e tano. (Kor. 1, 9:20-23) A horoa mai ai te taata fare i to ˈna manaˈo, mea maitai aˈe ia faatano i ta oe pahonoraa i nia i ta ˈna e haapeapea ra i te parau i ta oe i faaineine na.
4. No te aha e mea tia ˈi ia faatanotano oioi?
4 Fatata roa te ati rahi e te hopea o teie nei ao. “Te poto nei te taime.” (Kor. 1, 7:29) Auê ïa i te faufaa ia faatanotano e ia na reira i teie nei â! E ohipa rahi ïa te ravehia hou te hopea!