E haapii anaˈe i te reo ateate i to tatou taata-tupu
1 Noa ˈtu e no ‘te mau fenua, te mau opu, te mau nunaa, e te mau reo atoa’ ratou, e nunaa tahoê te mau Ite no Iehova, e huitaeae mau nunaa rau. (Apo. 7:9) Mea faahiahia te reira i roto i te hoê ao amahamaha mai to tatou nei. E nafea te reira e tupu ai? No te mea ‘ua tauihia to tatou reo ei reo ateate.’—Zeph. 3:9, MN.
2 Mau faahopearaa faahiahia roa: Eaha te reo ateate? O te maramaramaraa tano ïa o te parau mau i roto i te Parau a te Atua no nia ia Iehova e i ta ˈna mau opuaraa, no nia iho â râ i te Basileia o te Atua. Mai tei tohuhia e Iesu, te operehia ra teie parau mau maoti te hoê tia i nia i te fenua, “te tavini haapao maitai e te paari,” o te turai ra i te taata “no roto i te mau parau atoa o te mau fenua ra” ia farii i te haamoriraa mau.—Mat. 24:45; Zek. 8:23.
3 A haapii ai ratou i te reo ateate, te hinaaro ra ratou e faaau i to ratou oraraa i nia i te mau ture aveia a Iehova. Te haapii ra ratou i te ‘ati maite ma te aau hoê e te manaˈo hoê.’ (Kor. 1, 1:10) Te turai atoa ra te haapiiraa a te Atua ia ratou ia pee i te hoê haerea afaro, ia faahiti i te mau parau tia e te maitatai, ia faaite iho â râ ratou i te parau apî maitai. (Tito 2:7, 8; Heb. 13:15) E mau tauiraa faahiahia roa o te faahanahana ra ia Iehova!
4 Te vai ra te hiˈoraa o te hoê taata o tei faaroo i te parau apî maitai e mea rahi ta ˈna mau uiraa o tei pahonohia maoti te Bibilia. No to ˈna putapû i ta ˈna i faaroo, ua haapii oia e piti taime i te hebedoma e ua haere i te mau putuputuraa. Ua maere oia i to ˈna farii-maitai-raahia i te Piha a te Basileia, no te mea e e ere hoê â nunaa to te rahiraa o te taata i putuputu mai. Aita i maoro, ua taui oia e ta ˈna vahine i to raua oraraa e ua bapetizohia. Mai reira mai, ua tauturu oia e 40 taata ia tavini ia Iehova, tae noa ˈtu e rave rahi fetii. Noa ˈtu to ˈna paruparu pae tino, ua rave oia i te taviniraa pionie aita i maoro aˈenei.
5 E haapii anaˈe i to tatou taata-tupu: No te mau ohipa e tupu ra na te ao nei, mea rahi te taata aau haavare ore o te hiˈopoa faahou ra i to ratou huru feruriraa e to ratou oraraa. Mai ia Iesu, e mea tia ia hinaaro tatou e tauturu ia ratou. Eaha te ravea e tauturu ai i te feia haavare ore ia haapii i te reo ateate? Te mau farerei-faahou-raa ïa e te mau haapiiraa bibilia maitatai.
6 Te hoê ravea maitai e tauturu ai i te feia e ohipa ra, o te faatereraa ïa i reira iho i te hoê haapiiraa bibilia poto i te uputa. (km 5/02 api 1) Ua tamata ˈtu anei outou? Ia faaineine outou i te hoê farerei-faahou-raa, a maiti i te hoê faaiteraa e tano i roto i te api hau o Ta tatou taviniraa i te Basileia no Tenuare 2002. Ua faataahia e rave rahi o te mau faaiteraa no te haamata roa ˈtu i te hiˈopoa i te buka rairai Titau aore ra te buka Ite. A faaineine ia outou i te faahaere mǎrû i te aparauraa mai te omuaraa parau e i te hoê paratarafa. I roto i tera paratarafa, a maiti hoê aore ra e piti irava bibilia o te taiohia e o te tatarahia, e a faahiti i te hoê uiraa ei faaotiraa. E faaô mai te reira i te paratarafa ta outou e tauaparau ia hoˈi atu outou.
7 No to ratou haapiiraa i te reo ateate, te fanaˈo ra te mau tavini a Iehova e rave rahi haamaitairaa. E faaitoito anaˈe ïa i to tatou taata-tupu ia amui mai ia tatou no te ‘tiaoro i te iˈoa o Iehova’ e no te “haamori ia ˈna ma te aau hoê”!—Zeph. 3:9.