Pahonoraa i ta outou mau uiraa
◼ Afea e tano ai e haamau i te hoê pǔpǔ reo ê?
Mai te peu e te vai ra te hoê nahoa taata reo ê huru rahi i roto i te tuhaa fenua a ta ratou amuiraa, ia rave te mau matahiapo i te mau ravea atoa no te faanaho i te pororaa na roto i tera reo e tia ˈi. (km 7/02 api 1; km 2/98 api 3-4) Peneiaˈe te purara ê ra te nunaa taata reo ê i nia i te mau tuhaa fenua a na amuiraa tapiri e piti aore ra e rave rahi. I roto i tera tupuraa, e haapao te aore ra te mau tiaau haaati i te horoa i te mau faaueraa i tera mau amuiraa, no te tauturu ia ratou ia haa amui i roto i te ohipa pororaa. I te tahi taime, e nehenehe atoa e faanaho hoê oreroraa parau no te taatoaraa aore ra hoê haapiiraa o Te Pare Tiairaa na roto i tera reo ê no te ite ehia taata e haere i te mau putuputuraa e tupu na roto i tera reo.
E nehenehe e haamau i te hoê pǔpǔ reo ê mai te peu e te vai ra te mau titauraa i muri nei: (1) Te taa maitai aˈe ra i te mau taata poro aore ra te mau taata e anaanatae ra i te parau mau i te parau apî maitai na roto i tera reo. (2) Te vata ra te hoê matahiapo aore ra te hoê tavini tauturu aravihi no te aratai i te pǔpǔ e no te faatere i te tahi aˈe putuputuraa tahebedoma. (3) Ua ineine te hoê tino matahiapo i te tiaau i te pǔpǔ. Ia naeahia teie mau titauraa, e faaara ˈtu te mau matahiapo i te amaa ia tapaohia te pǔpǔ e ia faataehia mai te mau faaueraa.
E haamata te rahiraa o te mau pǔpǔ ma te faatupu i te haapiiraa buka tahebedoma. I muri aˈe, e nehenehe te mau matahiapo e farii i te tahi atu mau putuputuraa, mai te putuputuraa no te taatoaraa e te haapiiraa o Te Pare Tiairaa. E nehenehe e hohora i na vauvauraa no 2, 3 e te 4 i te Haapiiraa o te taviniraa teotaratia i roto i te piha piti mai te peu e e tia i te hoê matahiapo aore ra te hoê tavini tauturu aravihi tei matau i te paraparau i tera reo ia rave i te tuhaa a te taeae aˈo i te haapiiraa. E amui atu râ te pǔpǔ i te amuiraa atoa no te faaroo i te vauvauraa o te tuhaa oreroraa, te oreroraa parau haapiiraa, te mau manaˈo faufaa o te taioraa bibilia e te putuputuraa no te taviniraa. E nehenehe atoa e faanaho i te tahi mau putuputuraa no te pororaa no te pǔpǔ.
E haa amui roa te mau melo atoa o te pǔpǔ i raro aˈe i te aratairaa a te tino matahiapo. E horoa te mau matahiapo i te mau aˈoraa faito noa e e tauturu ratou i te haapao i te mau hinaaro o te pǔpǔ. Ia tere oia i te amuiraa e faaitoito ra i te pǔpǔ, e faanaho atoa te tiaau haaati i te poro e te pǔpǔ no te patu atu i te pae varua. Maoti te haamaitairaa a Iehova, e riro mai paha tera pǔpǔ reo ê i muri aˈe ei amuiraa.