Eiaha e moe ia tatou to tatou mau hoa ruhiruhia taiva ore noa
1 Noa ˈtu e e vahine ivi e te ruhiruhia (84 matahiti), ‘aore roa Ana i faarue i te hiero.’ Ua haamaitai o Iehova i to ˈna taiva ore ma te horoa i te hoê haamaitairaa taa ê na ˈna. (Luka 2:36-38) I teie mahana, te faatupu nei e rave rahi taeae e tuahine i te hoê â feruriraa e to Ana noa ˈtu te mau fifi ta ratou e farerei nei. I te tahi mau taime, e toaruaru paha to tatou mau hoa taiva ore no te maˈimaˈi aore ra te mau taotiaraa o te matahiti rahi. E hiˈo mai tatou i te tahi mau tuhaa e au e faaitoito e e tauturu ai tatou ia ratou ia tapea maite i te mau peu maitatai i te pae varua.
2 Te mau putuputuraa e te pororaa: Te tae tamau nei e rave rahi Kerisetiano ruhiruhia taiva ore i te mau putuputuraa Kerisetiano no te mea te tii nei te mau taeae e te mau tuahine ma te here ia ratou. Mea na reira taua feia taiva ore taime roa e patuhia ˈi i te pae varua, e fanaˈo atoa râ te amuiraa i te mau haamaitairaa rahi. Ua apiti aˈena anei outou i roto i teie ohipa maitai?—Heb. 13:16.
3 E oaoa e e mauruuru te mau Kerisetiano mau ia apiti tamau i roto i te taviniraa. Mea fifi râ paha te reira no to tatou mau hoa poro here ruhiruhia e te tino paruparu. E nehenehe anei hoê o ratou e riro ei “hoa rave ohipa” no outou i roto i te hoê tuhaa o te taviniraa? (Roma 16:3, 9, 21) E nehenehe outou e ani ia ˈna ia apiti i roto i te faaiteraa na roto i te niuniu paraparau, aore ra i roto i te hoê farerei-faahou-raa aore ra te hoê haapiiraa bibilia. Mai te peu e eita ta tera taata poro e nehenehe e faarue i to ˈna fare, eita anei ta outou taata haapii e nehenehe e haere i ǒ na?
4 Te haapiiraa e te amuimuiraa e to tatou mau hoa: I te tahi mau taime, e titau vetahi i te hoê Ite ruhiruhia aore ra tino paruparu ia apiti i ta ratou haapiiraa utuafare, aore ra e faatere roa ratou i taua haapiiraa ra i ǒ na. Ua afai te hoê metua vahine i ta ˈna na tamarii apî e piti i ǒ te hoê tuahine ruhiruhia ia haapii ratou i Ta ˈu Buka Aamu Bibilia. O ratou pauroa tei fanaˈo i te mau faaitoitoraa. Mea au atoa na to tatou mau hoa ruhiruhia ia titau-manihini-hia ratou i te hoê tamaaraa aore ra i te hoê taime faafaaearaa e te mau hoa. Mai te peu e eita e maraa i te tahi feia tino paruparu te mau farereiraa roroa, no te aha e ore ai e farerei poto noa ia ratou no te taio, no te pure e o ratou aore ra no te faatia ia ratou i te hoê tupuraa faaitoito?—Roma 1:11, 12.
5 Te haafaufaa rahi nei o Iehova i to tatou mau hoa ruhiruhia taiva ore noa. (Heb. 6:10, 11) E nehenehe tatou e pee ia ˈna e e faaite e te here atoa nei tatou ia ratou na roto i te tautururaa ˈtu ia tapea maite i te mau peu maitatai i te pae varua.