E faaite anaˈe i te poroi o te Basileia
1 ‘E parau haere â vau i te parau maitai o te basileia o te Atua i tonohia mai ai hoi au.’ (Luka 4:43) Mea na roto i teie mau parau to Iesu faataaraa i te manaˈo tumu o ta ˈna taviniraa: te Basileia o te Atua. Ua niu-atoa-hia te poroi ta tatou e faaite nei i teie mahana i nia i te Basileia, mai tei tohuhia i roto i te Mataio 24:14: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” Eaha te pue parau mau no nia i te Basileia o te Atua ia faaroo te taata e tia ˈi?
2 Te faatere ra te Basileia o te Atua i teie mahana mai te raˈi mai, e fatata e mono oia i te faatereraa taata atoa. Ua tiavaru-aˈena-hia te Diabolo mai te raˈi mai, e ua tae ta ˈna faanahoraa ino o te mau mea i to ˈna mau mahana hopea. (Apo. 12:10, 12) E haamou-roa-hia taua faanahoraa nei o te mau mea, eita râ te Basileia o te Atua e aueue. E vai oia e a muri noa ˈtu.—Dan. 2:44; Heb. 12:28.
3 E haamâha te Basileia i te mau hinaaro tia o te huitaata faaroo. E faaora mai oia ia ratou i te mauiui o te tamaˈi, te ohipa ino, te hamani-ino-raa, e te veve. (Sal. 46:8, 9; 72:12-14) E fanaˈo te taatoaraa i te maa pue. (Sal. 72:16; Isa. 25:6) Te maˈi e te mau huru paruparu, eita ïa e haamanaˈo-faahou-hia. (Isa. 33:24; 35:5, 6) A haere tia ˈtu ai te huitaata i te huru tia roa, e riro te fenua ei paradaiso; e parahi amui to ˈna mau taata ma te tahoê.—Isa. 11:6-9.
4 E faaite to tatou huru oraraa i teie iho mahana e e hinaaro tatou e riro ei mau melo huiraatira no te Basileia o te Atua. Mea maitai ia ohipa te poroi o te Basileia i nia i to tatou oraraa taatoa, tae noa ˈtu ta tatou mau fa e mau ohipa matamua roa e rave. Ei hiˈoraa, mea titauhia ia haapao tatou i te mau hinaaro o to tatou utuafare, eiaha râ tatou e vaiiho i te mau tapitapiraa pae materia ia na nia ˈˈe i te mau faufaa a te Basileia. (Mat. 13:22; Tim. 1, 5:8) E pee maori râ tatou i te aˈoraa a Iesu: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra [mau mea materia faufaa roa o te oraraa] ia outou.”—Mat. 6:33.
5 E mea faufaa roa ia faaroo te mau taata i te poroi o te Basileia e ia haapao atu oi vai aˈe te taime. Ia tauturu ïa tatou ia ratou na roto i te “faaite-hua-raa ˈtu i te parau o te basileia o te Atua ra”!—Ohi. 19:8.