Eiaha tatou e tapi i te mau “mea faufaa ore”
1 E ravea aparauraa hinaaro-roa-hia te e-mail i teie mahana. E ere i te mea ino ia faaohipa i te reira no te faaite i te tahi mau tupuraa aore ra i te tahi mau manaˈo i to tatou utuafare e to tatou mau hoa; teie râ e nafea te hoê faaohiparaa taotia-ore-hia o te rata eretoroni e turai ai ia tatou ia pee haere i te mau “mea faufaa ore?”—Mas. 12:11.
2 Te mau faaararaa no nia i te mau e-mail: Te manaˈo nei vetahi e e piri roa ˈtu ratou i te faanahonahoraa a Iehova ia tae mai ta ratou rata eretoroni ta ratou e manaˈo nei e e mau parau apî roa. I te tahi mau taime e mau aamu, e mau tatararaa no nia i te mau ohipa a te Betela, e mau parau faataa no nia i te mau ati aore ra i te hamani-ino-raa, e mau haamaramaramaraa huna atoa e faataehia i te Haapiiraa no te taviniraa o te Basileia. Te hinaaro ru nei vetahi i te afai i teie mau huru poroi, ma te manaˈo e o ratou te feia matamua e faaite i te parau apî i to ratou mau hoa.
3 I te tahi mau taime, e tavirihia aore ra e faarahihia te mau haamaramaramaraa aore ra te mau tupuraa i ora-mau-hia. E ite-atoa-hia te hoê huru hape, no te mea te hinaaro nei te feia e faaite nei i te reira e faateniteni ia ratou iho. E pinepine, aita te feia e ru nei i te haaparare i teie mau huru haamaramaramaraa i ite i te taatoaraa o te mau mea. (Mas. 29:20) I roto i te tahi mau tupuraa, e faaroo-atoa-hia te mau aamu maere no te mea e mea arearea. E au teie mau parau faataa tano ore aore ra haavare i te mau “fabula,” o te ore e faatupu i te paieti mau i te Atua.—Tim. 1, 4:6, 7.
4 Mai te peu e e haaparare tatou i te mau parau apî tano ore, e tuhaa ta tatou e amo i roto i te oto aore ra te peapea e nehenehe e tupu mai. I te taeraa mai te hoê parau faarahi a Davida o te faaite ra e ua taparahi-pauroa-hia ta ˈna mau tamaiti, ‘ua hahae atura oia i tana ahu’ no te mauiui. Teie râ, hoê noa o ta ˈna mau tamaiti i pohe. E mea peapea hoi taua tupuraa ra, teie râ ua rahi atu â te oto o Davida no teie parau i faarahihia. (Sam. 2, 13:30-33) Eita roa ˈtu tatou e hinaaro e rave i te tahi noa ˈˈe mea o te faahape i to tatou mau taeae aore ra o te haaparuparu ia ratou.
5 Te arai i haamauhia e te Atua: E haamanaˈo na tatou e ua haamau to tatou Metua i te raˈi i te hoê arai no te aparauraa, “te tavini haapao maitai e te paari.” Na ˈna e faataa i te mau haamaramaramaraa e faaitehia i te fetii faaroo e i te “hora mau” no te haaparare i te reira. O te faanahonahoraa teotaratia anaˈe te horoa i teie maa pae varua. E tamau noa ïa tatou i te maimi i te mau haamaramaramaraa e nehenehe e tiaturihia na roto i te arai i haamauhia e te Atua, e eiaha na roto i te Internet.—Mat. 24:45.
6 Te mau afata poroi Web: E tano maitai ta tatou afata poroi Web, www.watchtower.org., no te haamaramarama i te taata. Aita e faufaa ia haamau te hoê taata, te hoê pǔpǔ taata aore ra te hoê amuiraa i te hoê api Web no nia i te mau Ite no Iehova. Ua tuu vetahi i te parau e vai ra i roto i ta tatou mau papai e te taatoaraa o te mau irava e te mau faahororaa i faaitehia, e ua pûpû atoa ratou i te tahi mau tumu parau tairururaa ma te tamoni. Noa ˈtu e e apî te noaa mai aore ra aita, te hamaniraa i te hohoˈa o te mau papai a te mau Ite no Iehova e te haaparareraa ˈtu na roto i te roro uira, e ofatiraa ïa i te ture no nia i te tiaraa e nenei. Noa ˈtu e te manaˈo nei te tahi pae e e ohipa tauturu teie i te mau taeae, eita te reira e fariihia e eiaha te reira ia tamauhia i te rave.
7 Ia faaohipa tatou i te manaˈo maitai i roto i te faaohiparaa i te mau e-mail, e î ïa to tatou feruriraa i “te mau taoˈa maitatai i hinaarohia ra.”—Mas. 24:4.