E mauruuru noa anaˈe i ta tatou e fanaˈo ra
1 Te aˈo nei te mau Papai ia tatou ia haapao i te mau hinaaro materia o to tatou utuafare, eiaha râ tatou e faariro i te reira ei fa matamua o to tatou oraraa. E tia ia tuuhia te mau mea pae varua i te parahiraa matamua. (Mat. 6:33; Tim. 1, 5:8) E ere i te mea ohie ia vai faito noa i teie tau “ati rahi faaruru atâ.” (Tim. 2, 3:1, MN) Na te aha e tauturu ia tatou?
2 E pee anaˈe i te manaˈo o te Bibilia: Te faaara maira te Parau a te Atua e e nehenehe te titauraa i te mau faufaa e aratai i te ati pae varua. (Koh. 5:10; Mat. 13:22; Tim. 1, 6:9, 10) I to tatou nei anotau ati rahi, e faahopearaa ino roa te tupu mai ia tapitapi tatou no ta tatou ohipa aore ra no te parau o te moni, a tuu atu ai tatou i te mau ohipa pae varua oia hoi te mau putuputuraa, te haapiiraa e te pororaa i te piti o te parahiraa i roto i to tatou oraraa. (Luka 21:34-36) Te horoa maira râ te Bibilia i teie aˈoraa: “E maa ta tatou, e te ahu, ia mauruuru tatou i te reira.”—Tim. 1, 6:7, 8.
3 E ere te auraa e e tia i te mau Kerisetiano ia ora i roto i te veve. E tauturu râ teie aˈoraa ia tatou ia faataa i to tatou mau hinaaro materia mau: te maa, te ahu e te nohoraa au noa. Mai te peu e te fanaˈo ra tatou i te mau mea e hinaarohia no te ora, eiaha ïa tatou e imi noa i te hoê huru oraraa teitei aˈe. Ia opua tatou e hoo mai i te tahi mea aore ra e haa hau atu â, mea maitai ia ui tatou ia tatou iho e: ‘E mea faufaa mau â anei?’ E turai te reira ia tatou ia pee i teie aˈoraa i faauruahia: “Ei parahiraa nounou taoˈa ore to outou, ia mauruuru i ta outou i noaa ra.”—Heb. 13:5.
4 Ia tiaturi tatou ia Iehova, e haamaitai oia ia tatou. (Mas. 3:5, 6) Noa ˈtu e e tia ia tatou ia rave i te ohipa ia noaa mai te mau mea e hinaarohia no te ora, eita tatou e niu i to tatou oraraa i nia i te reira. Noa ˈtu e e mea iti ta tatou aore ra mea rahi, e tiaturi tatou ia Iehova no te haamâha i to tatou mau hinaaro. (Phil. 4:11-13) E horoa mai oia i te mauruuru e te tahi atu â mau haamaitairaa.
5 E pee anaˈe i te mau hiˈoraa o te faaroo: Ua faahaehaa riirii noa te hoê metua vahine, o te aratai ra o o ˈna anaˈe i ta ˈna tamahine na te eˈa o te parau mau, i to ˈna oraraa. Mea au na ˈna to ˈna fare nahonaho, ua faaea râ oia i roto i te hoê fare nainai aˈe, e te hoê nohoraa i muri iho. Ua faaiti mai ïa te reira i to ˈna taime i te ohipa ia rahi aˈe te taime no te taviniraa. I te paariraa mai e te faaipoiporaa ta ˈna tamahine, ua ani oia e ia faatuhaa-oioi-hia oia, noa ˈtu e e faaiti mai te reira i ta ˈna moni ohipa. E pionie tamau to tatou tuahine a hitu matahiti i teie nei, e aita oia e tatarahapa ra i to ˈna raveraa i te mau haapaeraa materia no te tuu i te mau faufaa a te Basileia i te parahiraa matamua.
6 E pionie te hoê matahiapo e ta ˈna vahine e rave rahi matahiti i te maoro, a rave atoa ˈi e toru tamarii. Ua haapii te mau melo o teie utuafare i te haapao noa i te faatamaa ia ratou eiaha râ e haamâha i to ratou mau hinaaro. Te na ô ra te taeae e: “Ua tia ia matou ia ora ma te faahaehaa. Noa ˈtu e ua farerei matou i te mau tau fifi, ua horoa noa mai o Iehova i te mau mea e hinaarohia. . . . Ia hiˈo vau i to ˈu utuafare ia tuu i te mau mea pae varua i te parahiraa matamua, te manaˈo nei au e e mea maitai te mau mea atoa e ua manuïa to matou oraraa.” Te na ô ra ta ˈna vahine e: “Ia hiˈo vau i [ta ˈu tane] ia rave i te tahi mau hopoia pae varua, e ite au i te mauruuru hohonu.” Te oaoa atoa ra te mau tamarii i te mea e ua maiti to ratou mau metua i te tavini ia Iehova ma te taime taatoa.
7 I te feia atoa o te maiti i te ora i te hoê oraraa paieti eiaha râ e titau i te mau taoˈa materia, te fafau maira te Bibilia i te mau haamaitairaa rahi, i teie nei e i roto i te oraraa no a muri aˈe.—Tim. 1, 4:8.