Te aroha mau e ta tatou taviniraa
1 E faaitoito te aroha ia tatou ia poro i te parau apî maitai ei tavini na Iehova. Ei hiˈoraa, e turai te reira ia tatou ia horoa i te faaiteraa ma te faanaho-ore-hia. E nehenehe tatou e haamarirau i te na reira, e turai râ te aroha ia tatou ia paraparau. Papu maitai, e turai te aroha ia tatou ia imi i te mau ravea no te haamata i te hoê aparauraa ma te aravihi, e ia aratai atu i nia i te Basileia.
2 E turai atoa te aroha mau ia tatou ia apiti tamau i roto i te pororaa i tera fare i tera fare e i te tahi atu mau tuhaa o te taviniraa Kerisetiano. Mai te peu e e nehenehe tatou e paraparau no nia i te Bibilia, te imi nei ïa tatou i te faahanahana i te Atua ra o Iehova e i te tauturu i te mau taata mai te mamoe ra ia haere na nia i te eˈa o te ora mure ore. (A hiˈo i te Mataio 7:13, 14.) E noa ˈtu e eita ta tatou e nehenehe e haamata i te aparauraa, e ere roa ˈtu ta tatou mau tutavaraa i te mea faufaa ore. To tatou noa iho taeraa ˈtu i mua i te taata, ua riro ïa ei faaiteraa, e te faufaahia ra tatou iho i te taviniraa, no te mea eita tatou e nehenehe e faaite i te mau parau mau bibilia ma te ore e faaitoito i to tatou faaroo.
3 E tia atoa i te mau tavini a Iehova ia faaite i te aroha mau no te farerei maite faahou i te mau taata e anaanatae ra i te parau mau bibilia. Na roto i te faatereraa i te mau haapiiraa bibilia i tera hebedoma i muri aˈe i tera hebedoma, e i tera avaˈe i muri aˈe i tera avaˈe, te faaite nei ïa tatou i to tatou here i te Atua e i to tatou taata-tupu, no te mea e titau taua ohipa ra i te taime, i te mau tutavaraa e i te mau haamâuˈaraa.—Mar. 12:28-31.
4 E turai te aroha miimii ore ia tatou ia haapae i to tatou oraraa fanaˈo materia no te rave i te taviniraa taime taatoa, mai te peu e e nehenehe tatou e rave i taua ohipa ra. E nehenehe tau tausani Ite e haapapu e te fanaˈo nei ratou e rave rahi haamaitairaa o te ore e nehenehe e faaauhia, ma te faaite i to ratou aroha na roto i taua ohipa ra. Mai te peu e e nehenehe outou e rave i te taviniraa taime taatoa, e aita râ outou e haafaufaa ra i te reira, aita ïa outou e ite ra eaha te mau haamaitairaa ta outou e vaiiho ra.—A hiˈo i te Mareko 10:29, 30.