E faaora te pororaa i te taata
1 Tera te ohipa faufaa roa ˈˈe e ravehia ra i te ao nei i teie nei taime. Tei nia te mata o te Atua ra o Iehova, o Iesu Mesia, e o te mau muriadi melahi i te reira. Eaha ïa te reira? Te pororaa i te Basileia. No te aha e mea faufaa roa te reira? No te mea e faaora te reira i te taata.—Roma 1:16; 10:13, 14.
2 Te manaˈo ra vetahi e e mea faufaa roa tatou no to tatou taata-tupu mai te peu e e tutava tatou i te haamaitai i te ao e haaati nei ia tatou. Te haa puai ra te taata e rave rahi ia haamauhia te hau, ia itea mai te ravea no te arai i te mau maˈi, aore ra ia faatitiaifarohia te faaravairaa faufaa. Eaha râ te mea faufaa roa ˈˈe?
3 Te hoê ohipa faufaa roa: Te faaite ra te poroi otahi o te Basileia i te tumu o te oraraa, te mau tumu o te mauiui e te hoê tiaturiraa mau no te tau no a muri aˈe. E tauturu te parau apî maitai i te taata ia riro ei hoa no Iehova e ia fanaˈo atu i “te hau a te Atua, o tei hau ê atu i te ite taata nei.” (Phil. 4:7) O te poroi anaˈe o te Basileia te haapii e nafea, ma te au ia faaohipahia, ia faaruru i teie iho nei i te mau fifi, e e nafea ia ora ˈtu i te haamouraa o te ao ino e fatata maira. (Ioa. 1, 2:17) E ere anei ïa i te mea hoona ia tutava tatou i te poro i te Basileia?
4 Eaha te ravea maitai roa ˈˈe no te tauturu i te taata o te hoê oire iti o tei taoto, o te haamatǎˈuhia ra e te parariraa o te hoê haapahuraa pape e fatata roa maira? Te taipuraa anei i te pape i muri mai i te haapahuraa pape? Te faaneheneheraa anei i te oire iti? Papu maitai e e ere. E tia ia faaara i te feia o te oire iti, ia faaara ia ratou e e roohia ratou i te ati e ia tauturu atu ia ratou ia horo ê. Tei mua mau te feia o te taoto ra i te pae varua i teie mahana i te ati. (Luka 21:34-36) I te mea e e fatata roa teie faanahoraa o te mau mea i te haamouhia, e haa anaˈe no te poro i te taata e rave rahi e nehenehe.—Tim. 2, 4:2; Pet. 2, 3:11, 12.
5 Eiaha tatou e faarue: E imi anaˈe i te ravea no te faaite i te parau apî maitai i te taata aau rotahi e rave rahi atu â: i to ratou fare, i roto i te aroâ, na roto i te niuniu paraparau, e ma te faanaho-ore-hia. O te ohipa ta Iehova i horoa mai na tatou te ohipa faufaa roa ˈˈe ta tatou e nehenehe e rave. Mai te peu e e poro tatou ma te itoito, ‘e ora tatou e te feia atoa e faaroo mai ia tatou.’—Tim. 1, 4:16.