Te hoê rata a te Tino Aratai
A haamata ˈi te mau matahiti matamua o te senekele 21, e oaoaraa mau te papairaa ˈtu ia outou paatoa, e “te hui taeae” na te ao nei, e te haapopouraa ˈtu no to outou rave-puai-raa i te ohipa. (Pet. 1, 2:17) Fatata a 2 000 matahiti aˈenei, ua ui o Iesu e: “Ia tae mai râ te Tamaiti a te taata nei, te vai ra anei te faaroo i te fenua nei?” (Luka 18:8) Na te itoito ta outou i faaite i roto i te matahiti taviniraa e pahono e e i te uiraa a Iesu! Ua faaooohia te tahi pae o outou no to outou faaroo. I te mau vahi e rave rahi, te faaoromai ra outou noa ˈtu te tamaˈi, te ati, te maˈi, aore ra te pohe poia. (Luka 21:10, 11) No to outou itoito no te ohipa parau-tia, te ite noa râ Iesu e ‘te vai ra te faaroo i te fenua nei.’ Papu e te oaoa ra to te raˈi no te reira!
Ua ite matou e e ere i te mea ohie ia faaoromai. A feruri na, ei hiˈoraa, i te mau tamataraa a to tatou mau taeae no te hoê fenua no Asia tooa o te râ. Fatata e e peu matauhia te haavî-uˈana-raa i te mau Ite no Iehova i taua fenua ra. Aita i maoro aˈenei, ua mau te hoê tairururaa hau fatata e 700 taata i te mau mutoi. Ua opani te hoê tâpûraa purumu eiaha na taata ê atu 1 300 ia tae atoa ˈtu. Ua tomo taue te hoê nahoa taata i tapoˈihia te mata, e mau mutoi hoi te tahi pae, i te vahi tairururaa, ua rutu i te mau tia e rave rahi, e ua tutui i te mau tauihaa e faaohipahia no te tairururaa i te auahi. I te tahi atu mau taime, ua tupai uˈana te feia faaroo etaeta i to tatou mau taeae i te mau tâpû raau î i te naero.
Mea riaria teie mau aroraa, e ere râ i te mea maere. Ua faauruahia te aposetolo Paulo e papai: “Te feia atoa e opua e haapao i te paieti ei roto â i te Mesia ra ia Iesu, e hamani-ino-atoa-hia ïa.” (Tim. 2, 3:12) I te senekele matamua, ua faaruru te mau Kerisetiano i te mau taoraraa parau e te mau hamani-ino-raa, e ua haapohe-atoa-hia te tahi pae. (Ohi. 5:40; 12:2; 16:22-24; 19:9) Hoê â atoa i te senekele 20, e ma te feaa ore e tamau noâ i te senekele 21. Te parau maira râ Iehova e: “Te mauhaa ra na oe i hamanihia ˈi ra e ore ïa e tupu.” (Isa. 54:17) Auê ïa haapapuraa faahiahia mau e! Oia mau, no te mea e, e mea faufaa tatou na Iehova i parau ai oia na roto i te arai o te peropheta ra o Zekaria e: “O te faatiaia ˈtu ia outou ra, ua faatiaia ïa i tana orio mata nei.” (Zek. 2:8) Aita to te mau enemi o te feia haamori ia Iehova e ravea e upootia ˈi i te pae hopea. E upootia mai te haamoriraa viivii ore!
Ei hiˈoraa, i te fenua i faahitihia ˈtu i nia ˈˈe, ua fanaˈo te mau Ite no Iehova e piti numera rahi roa ˈˈe o te feia poro i te roaraa o te matahiti taviniraa 2001. Oia, noa ˈtu te mau fifi, te faaitoito ra to tatou mau taeae, mai to te mau vahi atoa. Na te ao atoa, i te roaraa o te matahiti taviniraa i mairi aˈenei, e 5 066 pǐpǐ apî tei bapetizohia i te hebedoma hoê ei faataiperaa i ta ratou pûpûraa na Iehova. I teie nei, ua faaoti maite teie mau pǐpǐ apî, e o tatou atoa, ‘ia mau maite â ma te nehenehe, e te î i te mau hinaaro atoa o te Atua ra.’—Kol. 4:12.
E rave atoa anaˈe i te tahi mau tupuraa apî i Heleni. Noa ˈtu te mau matahiti patoiraa uˈana a te Ekalesia Orthodoxe Heleni, i teie nei, ua itehia te mau Ite no Iehova e te hau mai te hoê “haapaoraa matauhia.” Te na ô râ te parau tei haamana i taua fariiraa ra e ua riro te Betela no Heleni “ei vahi moˈa e te pûpûhia no te haamoriraa i te Atua.” Te oaoa atoa nei matou i te faaara ˈtu ia outou e, i te roaraa o te matahiti taviniraa i mairi aˈenei, ua faaoti te tahi mau tiripuna i te mau parau haavaraa maitatai no ta tatou haamoriraa i Bulgarie, te mau Hau Amui, Heremani, Kanada, Rumania, Rusia, e i Tapone. E haamauruuru mau â tatou ia Iehova no te vai-matara-noa-raa te uputa o te taviniraa i taua mau fenua ra!
Ia hiˈo tatou i te huru e turu ai Iehova i to ˈna nunaa i teie nei mau mahana hopea, e ite mai tatou e o oia to tatou Hoa maitai roa ˈˈe. Mea au na tatou to tatou taairaa e oia, ua ite hoi tatou e te here ra, te haapii maira, e te aˈo ra oia ia tatou. Oia, e tamau noa tatou i te roohia i te mau tamataraa faaroo. Na te faaroo aueue ore râ ia Iehova e turu ia tatou. Ua papai Iakobo e: “E au mau taeae ra, ia roohia outou e te ati e rave rahi te huru ra, a parau outou e, e mea oaoa anaˈe ïa. Ua ite hoi outou e, na taua tamataraa i to outou faaroo ra e faatupu i te faaoromai tamau.” (Iak. 1:2, 3) Hau atu â, e haapapu to tatou faaoromai e mea here na tatou ia Iehova, e e oaoa iti rahi ta te reira e hopoi mai! Ia papu ia outou, e te mau taeae here e, e turu Iehova ia tatou paatoa. Ia ore tatou e taiva, eita e ore e e tauturu oia ia tatou e ia tae atu tatou i roto i te ao apî. Te hinaaro ra oia e ia manuïa tatou.
No reira, te faaitoito atu nei matou ia outou e te mau taeae e te mau tuahine e, te mea apî e te mea paari, ia haamanaˈo maitai i te mau haamaitairaa faahiahia e tiai maira ia tatou. Ia hoê â to tatou feruriraa e to te aposetolo Paulo tei papai e: “Te parau nei hoi au, e ore teie nei mau pohe e au ia faito i te maitai e faaitehia mai ia tatou nei.” (Roma 8:18) A turui i nia ia Iehova ia faaû outou i te ati huru rau. A faaoromai, e eiaha e haaparuparu. Eita roa ˈtu outou e tatarahapa, eita roa ˈtu. Te haapapu maira te Parau a te Atua e: “O tei tiahia râ i te faaroo ra, e ora ïa.”—Hab. 2:4.
To outou mau taeae,
Te Tino Aratai a te mau Ite no Iehova