“Eaha hoi ratou e tia ˈi ia faaroo?”
1 Ua parau maitai Iesu e: “E mata na râ te evanelia i te faaite-haere-hia i te mau fenua atoa nei.” (Mar. 13:10) Noa ˈtu ta tatou mau tutavaraa itoito, e mau hanere mirioni â taata tei ore i porohia ˈtura. Te taotia nei te tahi mau faatereraa i ta tatou mau ohipa, e te vai ra te hoê huiraatira rahi o te maraa oioi noa ra i roto i te mau fenua e rave rahi. “Eaha hoi ratou e tia ˈi ia faaroo?”—Roma 10:14.
2 A tiaturi ia Iehova: E haamanaˈo anaˈe e ua ite Iehova i te huru o te aau o te mau taata atoa. Noa ˈtu eaha te huru tupuraa o te hoê taata, mai te peu e e imi mau oia i te parau mau no nia i te Atua, e itea mai ïa ia ˈna te reira.—Par. 1, 28:9.
3 Ua tapitapi Aberahama no te mau taata no Sodoma e Gomora. Ua haapapu râ te Atua ia ˈna e eita oia e haamou ia Sodoma mai te peu e e itea mai hoê ahuru anaˈe taata parau-tia. (Gen. 18:20, 23, 25, 32) Ia au i te tupuraa o Lota e ta ˈna nau tamahine o tei faaorahia, aita roa ˈtu Iehova i haamou i te taata parau-tia e te taata ino.—Pet. 2, 2:6-9.
4 I te hoê taime, ua manaˈo Elia e o o ˈna anaˈe te tavini ra i te Atua mau. Ua haapapu râ Iehova ia ˈna e e ere o ˈna anaˈe e e oti te ohipa ta ˈna i haamata mai. (Arii 1, 19:14-18) Eaha ïa no teie mahana?
5 A haa noa i roto i te taviniraa i te Atua: I nia i teihea faito e tia ˈi ia parare te pororaa, aita tatou i ite. Na Iehova e haapao i taua ohipa ra e e faaohipa oia i ta ˈna mau melahi no te aratai i te reira. (Apo. 14:6, 7) Na ˈna e faaoti i nia i teihea faito e tia ˈi ia porohia te mau nunaa atoa. Mai te peu e e faaoti oia e na reira, e nehenehe ta ˈna e rave e ia faaitehia te poroi o te Basileia na roto i te tahi mau ravea eita e noaa ia tatou ia manaˈo, “ia ite” e rave rahi atu â taata ‘i te evanelia e ia faaroo.’ (Ohi. 15:7) E ohipa Iehova ma te au maite roa e to ˈna huru: e Atua paari, te tia e te î i te here.
6 E fanaˈoraa taa ê ta tatou e ohipa ia au i te hinaaro o Iehova, ma te rave i tei maraa ia tatou ia faaroo te taatoaraa o te taata i te parau apî maitai.—Kor. 1, 9:16.