Te mau maitai no roto mai i te mauruuru no te here o Iehova—Tuhaa matamua
1 Ua papai te aposetolo Ioane e: “Te hinaaro nei tatou ia ˈna, no te mea oia na tei hinaaro mai na ia tatou nei.” (Ioa. 1, 4:19) Ia feruri tatou i te mau mea atoa ta Iehova i horoa mai na tatou, e turaihia ïa tatou ia faaite atoa ˈtu i to tatou mauruuru hohonu. I roto i taua tuhaa ra, ua faaite Iesu i te hiˈoraa na roto i te faaiteraa i te iˈoa e te Basileia o te Atua ma te auraro. (Ioa. 14:31) Ia faufaahia tatou, e hiˈopoa anaˈe i te tahi mau ravea e faaite ai tatou i to tatou mauruuru no te here o Iehova, tae noa ˈtu no te mau haamaitairaa e noaa mai.
2 Te pororaa i tera e tera fare: Ua haapii Iesu i ta ˈna mau pǐpǐ nafea ia poro i te Basileia. Ia au i ta ˈna mau faaueraa, e haere mau â ratou i tera e tera fare no te haaparare i te parau apî maitai. (Luka 9:1-6; 10:1-7) Ia ore tatou e toaruaru i roto i taua ohipa ra noa ˈtu te tâuˈa ore e te patoiraa ta tatou e faaruru atu, e tia ia faaite i te here ia Iehova e i to tatou taata-tupu. Teie râ, e mau maitai atoa te noaa mai ia tatou, i te mea e e haapuaihia to tatou faaroo, e haapaarihia ta tatou tiaturiraa papu e e faaapîhia to tatou tiaturiraa.
3 I roto i taua ohipa ra e arataihia ra e te mau melahi, ua itea mai ia tatou te mau taata e rave rahi o te poia ra e o te poihâ ra i te parau mau. (Apo. 14:6) Ua parau vetahi pae e ua pure ratou no te fanaˈo i te tauturu i to te hoê Ite patotoraa ˈtu i to ratou opani. I te mau Antilles, ua poro e piti tuahine apitihia mai e te hoê tamaroa iti i tera e tera fare. I to raua opuaraa e hoˈi i ǒ raua, ua haere te tamaroa iti o ˈna anaˈe e patoto i to muri atu opani e ua tatara maira te hoê vahine apî. I to raua iteraa i te reira, ua haere ihora na tuahine e paraparau ia ˈna. Ua faatomo mai te vahine apî ia ratou e ua faataa e no pure noa ˈtura oia i te Atua ia aratai mai i te mau Ite ia haapii ratou ia ˈna i te Bibilia.
4 Te pororaa i roto i te aroâ: I roto i te tahi mau tuhaa fenua, mea fifi roa ia farerei i te taata i ǒ ratou. No reira ˈtura, e ravea maitai te pororaa i roto i te aroâ no te paraparau ia ratou. Hau atu â, e faaea e rave rahi i roto i te tahi mau vahi nohoraa mea opanihia te purumu aore ra i roto i te mau nohoraa paruru-maitai-hia eita e nehenehe e poro i tera e tera fare i reira. Teie râ, e turai to tatou here ia Iehova ia faaohipa tatou i te mau ravea atoa e nehenehe, te pororaa i roto i te aroâ iho â râ, no te faaite i te poroi o te Basileia i te taata.—Mas. 1:20, 21.
5 Te mau farerei-faahou-raa: I te mea e te imi nei tatou i te feia o tei “ite i to ratou veve i te pae varua,” e hinaaro tatou e rave i tei maraa ia tatou no te haamâha i to ratou mau hinaaro. (Mat. 5:3, MN) Oia hoi, e pîpî i te mau huero o te parau mau ta tatou i tanu atu. (Kor. 1, 3:6-8) I Auteralia, ua horoa ˈtu te hoê tuahine i te hoê api parau na te hoê vahine e au ra e aita e anaanatae ra. Teie râ, ua tutava noa te tuahine i te ite faahou ia ˈna i to ˈna fare. I to ˈna farerei-faahou-raa ia ˈna i te pae hopea, ua taa i te tuahine e i muri aˈe i to ˈna tere matamua, ua hoo mai taua vahine ra i te hoê Bibilia moni rahi. Ua haamata aˈera te tuahine i te haapii e o ˈna.
6 Te mau haapiiraa bibilia: E nehenehe teie tuhaa o ta tatou taviniraa e riro ei mea au roa e e oaoa roa ˈi tatou. Auê ïa haamaitairaa e tauturu i te taata ia ite ia Iehova, e ite ia ratou ia rave i te tahi mau tauiraa i roto i to ratou oraraa no te faaoaoa ia ˈna e ia bapetizohia ratou ei taipe o ta ratou euhe i te Atua e!—Tes. 1, 2:20; Ioa. 3, 4.
7 I roto i te tumu parau i mua nei, e ite mai tatou i te tahi atu mau haamaitairaa no roto mai i to tatou mauruuru no te here o Iehova.