E hinaaro anei outou e rave hau atu â?
1 Ua faaau Iesu i te Basileia i te mau taoˈa faufaa roa. (Mat. 13:44-46) E taoˈa faufaa atoa te ohipa e haaparare i te parau apî maitai. E au ia tuu tatou i teie taviniraa i te parahiraa matamua i roto i to tatou oraraa, noa ˈtu e e titauhia te tahi haapaeraa no te apiti-hope-raa ˈtu. (Mat. 6:19-21) E hinaaro anei outou e rave hau atu â i roto i te taviniraa i te Basileia?
2 Te tahi mau manaˈo faufaa: No te faarahi atu â i to tatou apitiraa i roto i te taviniraa, mea rahi te mau mea e titauhia: (1) e faaoti papu e tuu i te mau faufaa o te Basileia i te parahiraa matamua i roto i to tatou oraraa (Mat. 6:33); (2) e faatupu i te faaroo e e turui atu i nia ia Iehova (Kor. 2, 4:1, 7); (3) e imi i te tauturu a te Atua na roto i te pure haavare ore e te tuutuu ore (Luka 11:8-10); (4) e tutava e e ohipa ia au i ta tatou mau pure.—Iak. 2:14, 17.
3 Mau ravea taa ê e faarahi ai i ta tatou taviniraa: E nehenehe tatou paatoa e haamau i te hoê fa matamua: e horoa tamau i te tahi taime i roto i te taviniraa i te mau avaˈe atoa. Aita râ anei outou e manaˈo atoa ra e faaohipa i te mau taime maitatai atoa no te poro ma te faanaho-ore-hia, e faariro i ta outou mau faaiteraa ei mea anaanatae atu â, e haamaitai i ta outou mau farerei-faahou-raa aore ra e tauturu i te mau taata ta outou e haapii ra ia haere maitai i mua? Eita anei ta outou e nehenehe e riro ei pionie tauturu aore ra tamau, aore ra e tavini i te vahi e hinaarohia ˈi te tauturu? Mai te peu e e taeae bapetizohia outou, e hinaaro anei outou e riro ei tavini tauturu aore ra matahiapo, e e tutava i te faaaravihi ia outou no te reira? (Tim. 1, 3:1, 10) Eita anei ta outou e nehenehe e faarahi atu â i ta outou taviniraa ma te faaî i ta outou parau aniraa no te taviniraa i te Betela, no te Haapiiraa faaineineraa no te Taviniraa aore ra no te faaineineraa mitionare i te Haapiiraa no Gileada?—Luka 10:2.
4 Ua faaitoitohia te hoê taeae e ohipa taime taatoa ta ˈna e o te haa ra i roto i te mau ohipa tuaro e rave rahi ia riro ei pionie tamau. Ua haamata oia ei pionie tauturu, e i muri aˈe, ua faanahonaho oia ia ˈna ia nehenehe oia e rave i te taviniraa taime taatoa. I muri aˈe, ua haere oia i te Haapiiraa faaineineraa no te Taviniraa, na te reira i faaineine ia ˈna ia tavini ei tiaau haaati i teie nei. E oaoa i te rahi to ˈna no to ˈna fariiraa i te mau faaitoitoraa i horoahia ˈtu e ua papu ia ˈna e mai te peu e te oaoa roa ra oia i teie mahana, no te mea ua faaoti oia e rave hau atu â i roto i te taviniraa i te Basileia.
5 E haamaitai Iehova i te feia o te pûpû ia ratou no te tavini ia ˈna. (Isa. 6:9) Eiaha outou e vaiiho i te hoê noa ˈˈe mea ia tapea ia outou i te faarahi i ta outou taviniraa, e i te fanaˈo i te mauruuru e te oaoa rahi atu â.