E vaiiho anaˈe i te mau faaanaanataeraa i to ratou parahiraa
1 I teie anotau fifi, e hinaaro tatou paatoa e taui i te tereraa i te tahi taime. Mea tano iho â ia faaanaanatae rii. Teie râ, mai te peu e e haamâuˈa rahi roa tatou i te taime no te faaanaanatae ia tatou e no te amuimui atu i to tatou mau hoa, e nehenehe e iti mai te taime no te rave i te mau ohipa pae varua. No reira e tia ˈi ia tatou ia vaiiho i te mau faaanaanataeraa i to ratou parahiraa. (Mat. 5:3) Nafea? Ma te pee i te aˈoraa e vai ra i roto i te Ephesia 5:15-17.
2 E haamau anaˈe i te tahi mau taotiaraa: Ua papai Paulo e e tia i te mau Kerisetiano ia “ara” nafea ratou e aratai ai i to ratou oraraa. Ia vai noa te mau taime faaanaanataeraa i roto i te mau taotiaraa o te mea e hinaaro-mau-hia, e titauhia te faito tano noa e te hitahita ore. Mea titauhia ia feruriruri maite nafea tatou e faaohipa ˈi i te taime e vata ˈi tatou. Ia riro te mau faaanaanataeraa ei maitairaa e tia ˈi; eiaha tatou e manaˈo e ua haamâuˈa tatou i to tatou taime, aore ra ua rohirohi tatou. Mai te peu e e fiu tatou, eita tatou e mauruuru e e faahapa tatou ia tatou i muri aˈe i to tatou faaanaanataeraa ia tatou, e tapao faaite te reira e e tia ia tatou ia rave i te tahi mau tauiraa no nia i ta tatou huru faaohiparaa i to tatou taime.
3 Ia vai faito noa tatou: Ua aˈo Paulo ia “faaherehere maite i te taime” no te mau ohipa faufaa roa ˈˈe o te oraraa, e eiaha e riro ei feia “manaˈo ore.” Eiaha te mau Kerisetiano pûpûhia na te Atua e haamau i to ratou oraraa i nia i te mau faaanaanataeraa. Noa ˈtu e e faaitoito te faafaaearaa e te faaanaanataeraa ia tatou i te pae tino, o te varua o te Atua, aore ra to ˈna puai ohipa, te tumu o te ito pae varua. (Isa. 40:29-31) Maoti te mau ohipa teotaratia—te haapiiraa i te Bibilia, te haereraa i te mau putuputuraa a te amuiraa, te apitiraa i roto i te taviniraa—e nehenehe ai tatou e fanaˈo i to ˈna varua eiaha râ te mau faaanaanataeraa.
4 E haamau anaˈe i te mau ohipa e rave na mua: Ua faaue Paulo i te mau Kerisetiano ia ‘ite i to Iehova ra hinaaro.’ Ua haapii Iesu e e tia ia haamauhia ta tatou mau ohipa i nia i te ohipa faufaa o to tatou oraraa, te Basileia o te Atua. (Mat. 6:33) Mea titauhia ia rave na mua tatou i te mau ohipa e nehenehe ai tatou e ora ia au i to tatou pûpûraa ia tatou na Iehova. I muri aˈe, e vai noa te mau faaanaanataeraa i to ratou parahiraa. Ia faaanaanatae tatou ia tatou, e ohipa maitai te reira i nia ia tatou, e e au roa ˈtu â tatou i te reira.—Koh. 5:12.