Mea faufaa anei te mau taairaa Kerisetiano?
1 “E ere roa ˈtu te hoê taata i te hoê motu.” Te faahiti noa ra teie mau parau a te hoê rohipehe no te senekele 17 i ta te Bibilia i parau oia hoi e hinaaro mau te taata e faatupu i te mau taairaa i rotopu ia ratou. (Mas. 18:1) E haamâha to tatou mau taairaa Kerisetiano i taua hinaaro ra. Eaha te mau maitai e noaa mai ia tatou?
2 I roto i te taviniraa: Te hoê o te mau maitai faahiahia roa ˈˈe o to tatou mau taairaa e to tatou mau taeae, oia ïa e haapuai e e tauturu te reira ia tatou i roto i te taviniraa i mua i te taata. Ua “tatoopiti” Iesu i te tonoraa i ta ˈna mau pǐpǐ e poro. (Mar. 6:7; Luka 10:1) Ia au i taua hiˈoraa ra, ia poro tatou e te tahi atu mau Kerisetiano, te ite ra tatou i te tanoraa mau o te Koheleta 4:9, 10. E haapuai to ratou faaroo, to ratou auraro e to ratou here ia tatou e e faaapî i to tatou itoito.
3 No te tauturu ia tatou iho: E horoa atoa mai to tatou mau taairaa autaeae i te faaitoitoraa e te aratairaa e hinaarohia no te upootia i nia i te mau fifi e te mau tamataraa. E huti paha to tatou mau hoa Kerisetiano i to tatou ara-maite-raa i nia i te tahi mau irava o te mau Papai e tano i to tatou iho mau haapeapearaa. E nehenehe atoa ratou e pure no tatou, mai ta tatou atoa e na reira ra no ratou. (Kor. 2, 1:11) Papu maitai, e haapuai e e turai to ratou hiˈoraa maitai ia tatou ia faatupu i te mau ohipa tia.
4 I te mau putuputuraa: E ite-atoa-hia te mau maitai o te mau taairaa Kerisetiano ia haere tamau tatou i te mau putuputuraa a te amuiraa. (Heb. 10:24, 25) E fanaˈo ïa tatou i te hoê haapiiraa pae varua maitai roa, e na roto i to tatou iho taeraa mai e piri noa ˈi tatou i to tatou mau hoa i roto i te faaroo. E mau taime taua mau putuputuraa ra e faaroo ai tatou i to tatou mau taeae e mau tuahine ia faaite i to ratou faaroo, mai nia mai i te tahua aore ra i roto i te feia i putuputu mai. (Roma 1:12) E haapaari tatou i to tatou autaeaeraa na roto i te aparauraa ia ratou na mua ˈˈe e i muri aˈe i te mau putuputuraa. E horoa mai taua mau aparauraa ra i te ravea e paraparau ai tatou no nia i te mau tupuraa o tei haapaari i to tatou iho faaroo. E ohipa maitai te amuimuiraa ˈtu i te mau Kerisetiano o te hinaaro ia Iehova, o te au i ta ˈna Parau, i ta ˈna ohipa e o te here i to ˈna nunaa, i nia i to tatou huru.—Phil. 2:1, 2.
5 E hinaaro tatou i to tatou mau hoa Kerisetiano. Aita anaˈe ratou, mea fifi roa no tatou ia pee i te eˈa pirihao o te aratai i te ora. Maoti to ratou here e ta ratou mau faaitoitoraa e nehenehe ai tatou e tamau i te haere tia ˈtu i te ao apî parau-tia a Iehova.—Mat. 7:14.