‘E tia te mau mea atoa nei i te Atua’
1 E ohipa faufaa te pororaa i te poroi o te Basileia na te ao atoa nei no te amuiraa Kerisetiano. (Mat. 24:14) E ohipa rahi te reira o te haamaere i te vetahi feia hiˈopoa. No reira, te manaˈo ra te taata e rave rahi e e titauhia te tahi mau ravea aita hoi ta tatou. No te tahi atu, eita ïa e maraa taua ohipa ra, no te mea te faaooohia ra, te patoihia ra e te hamani-ino-hia ra tatou. (Mat. 24:9; Tim. 2, 3:12) Ua papu i te feia feaa e eita e nehenehe e rave i taua ohipa ra. Ua faahiti râ Iesu e: ‘E tia te mau mea atoa nei i te Atua.’—Mat. 19:26.
2 Te tahi mau hiˈoraa ia pee: I to te taata ra o Iesu haamataraa i ta ˈna taviniraa, ua faaruru oia anaˈe i te taatoaraa o te hoê faanahoraa o te mau mea. Ia ore oia e manuïa, ua faaino-roa-hia oia e to ˈna mau enemi, e inaha, ua haapohe aˈera ia ˈna ma te ino mau. Teie râ, i te pae hopea, ua parau Iesu ma te tiaturi papu e: “Ua [vî] teie nei ao ia ˈu.” (Ioa. 16:33; MN) Auê ïa upootiaraa faahiahia mau e!
3 Ua faaite te mau pǐpǐ a Iesu i te hoê â itoito i roto i te taviniraa Kerisetiano. E rave rahi tei rutuhia, tei taparahihia, tei hurihia i roto i te fare tapearaa e tei haapohe-atoa-hia. Teie râ, ‘ua oaoa ratou i te mea no to ˈna iˈoa i manaˈohia ˈi ratou e au ia ratou taua hamani ino ra.’ (Ohi. 5:41) Ma te manaˈo-ore-hia, ua rave ratou i te ohipa e au ra e eita e maraa ia ratou oia hoi e poro i te parau apî maitai “e tae noa ˈtu i te hopea o te fenua ra.”—Ohi. 1:8; Kol. 1:23.
4 Nafea e manuïa ˈi i teie mahana: Ua opua atoa tatou ma te itoito e poro i te Basileia a manaˈohia hoi e eita e maraa. E noa ˈtu te opaniraa, te hamani-ino-raa, te tapearaa i roto i te fare tapearaa e te tahi atu mau ohipa iino no te haafifi ia tatou, te manuïa ra tatou. Mea nafea? “Eiaha i te puai taata, e te mana taata, na tau varua râ, te parau maira Iehova sabaota ra.” (Zek. 4:6) I te mea e tei pihai iho te Atua ia tatou, aita hoê mea e tapea i ta tatou ohipa.—Roma 8:31.
5 Ia poro tatou, aita e tumu ia haama noa tatou aore ra ia mǎtaˈu, ia feaa atoa no nia i to tatou mau aravihi. (Kor. 2, 2:16, 17) E mau tumu faufaa ta tatou no te tamau i te faaite i te parau apî maitai o te Basileia. Maoti te tauturu a Iehova, ‘e tia ˈi te mau mea ia tatou.’—Luka 18:27.