E tauturu anaˈe ia vetahi ê ia haere mai i te mau putuputuraa
1 “Te titau-manihini-hia ˈtu nei te mau taata tapiri . . . o te hinaaro ra e haere mai i te mau putuputuraa ia haere mai.” Mai te taime a neneihia ˈi teie parau faaite i roto i te Phare de la Tour de Sion (Beretane), i te avaˈe Novema 1880, ua rohi noa te mau Ite no Iehova i te titau manihini i to ratou mau taata-tupu ia putuputu mai no te fanaˈo i te hoê haapiiraa bibilia. (Apo. 22:17) E tuhaa faufaa te reira o te haamoriraa mau.
2 Mea faufaa roa ia haere mai i te mau putuputuraa: Ia putuputu mai tatou e te amuiraa, e noaa mai ia tatou te tahi mau maitai. E ite maitai aˈe tatou i to tatou Atua faahiahia ra o Iehova. E putuputu tatou no te riro ei ‘taata haapiihia e Iehova.’ (Isa. 54:13) E horoa ta ˈna faanahonahoraa i te hoê porotarama haapiiraa bibilia tamau ia haafatata ˈtu tatou ia ˈna e e pûpû mai i te hoê tauturu mau na tatou no te faaohipa i “te hinaaro atoa o te Atua.” (Ohi. 20:27; Luka 12:42) E faaineine te mau putuputuraa ia tatou ia aravihi i te haapii i te Parau a te Atua. E tauturu te mau haamanaˈoraa no roto mai i te mau Papai ia tatou ia atuatu i te mau taairaa maitatai e to tatou mau taata-tupu e o Iehova iho. E haapaari te auhoaraa e te tahi atu mau taata, o te here atoa i te Atua, i to tatou faaroo.—Roma 1:11, 12.
3 E titau manihini roa ˈtu anaˈe i te mau taata: I te haapiiraa matamua iho, e titau manihini anaˈe i te feia haapii i te Bibilia atoa ia haere mai i te mau putuputuraa. E horoa anaˈe i te hoê parau titau-manihini-raa na ˈna. E faatupu anaˈe i to ˈna anaanatae ma te faaite atu i te hoê manaˈo o tei faaitoito ia tatou i te putuputuraa hopea e ma te hiˈopoa i te hoê tumu parau o te vauvauhia i te putuputuraa i muri iho. E faataa anaˈe ia ˈna i te Piha a te Basileia e ia papu ia tatou e e itea mai ia ˈna teihea.
4 Mai te peu e eita te hoê taata haapii e haere oioi mai i te mau putuputuraa, e tamau noa anaˈe i te titau manihini ia ˈna. I te mau hebedoma atoa, tau minuti rii, e faataa anaˈe ia ˈna i te tereraa o ta tatou faanahonahoraa. E faaohipa anaˈe i te buka rairai ra Les Témoins de Jéhovah—Qui sont-ils? Quelles sont leurs croyances? e te ripene video ra Les Témoins de Jéhovah: un nom, une organisation ia matau te taata haapii ia tatou e ta tatou mau putuputuraa. E afai anaˈe mai i te tahi atu mau taata poro i roto i te haapiiraa, ia matau oia ia ratou. I roto i ta tatou mau pure, e haamauruuru anaˈe ia Iehova no te faanahonahoraa ta ˈna i haamau e e paraparau anaˈe no nia i te faufaaraa no te taata haapii ia apiti mai.
5 Eiaha tatou e taiâ i te tauturu i te mau taata no anaanatae noa maira i te parau mau ia putuputu mai e o tatou. A rahi noa ˈi to ratou mauruuru ia Iehova, e turaihia ratou ia faaohipa i ta ratou e haapii ra e ia riro ei melo o te faanahonahoraa tahoê a te Atua.—Kor. 1, 14:25.