Na te haamaitairaa a Iehova e faaona
1 E hiˈo-pinepine-hia te manuïaraa o te hoê taata ia au i ta ˈna moni e noaa. No reira e rave rahi taata e tiaturi ai e o te feia taoˈa rahi te feia oaoa roa ˈˈe. Teie râ, te hape mau ra te feia e manaˈo e e faaoaoa te moni. (Koh. 5:12) Aita roa ˈˈe e oaoa maoro e tiai ra i te feia “e mârô e ia rahi te taoˈa” i te pae materia. (Tim. 1, 6:9) I te tahi aˈe pae, te oaoa mau ra te mau tavini a Iehova e te fanaˈo ra ratou i te faufaa rahi roa ˈˈe e vai ra. (Mas. 10:22; Apo. 2:9) Ia au i teihea hiˈoraa?
2 E faitohia ta tatou faufaa ia au i te aha: Te vai ra ia tatou te hoê ite hohonu faufaa i te pae varua e te maramarama i te Parau a te Atua, te Bibilia. Na roto i te arai o ta ˈna faanahonahoraa i te fenua nei, te haapii tamau maira Iehova no nia ia ˈna e ta ˈna Tamaiti, o te horoa mai hoi i te mau haamaitairaa maoro na tatou. Maoti te hoê maramarama mau e nehenehe ai tatou e haafatata ˈtu ia Iehova e e fanaˈo i te mau taairaa piri e o ˈna. (Iak. 4:8) Na roto i te taaraa i te maitai e te ino e na roto i te peeraa i te mau ture a te Atua, te paruru ra tatou ia tatou i te tahi mau maˈi e te tahi atu mau ati. Te tiaturi ra tatou e e aupuru mai Iehova ia tatou, na te reira e horoa mai i te mauruuru e te hau o te feruriraa na tatou.—Mat. 6:33.
3 Te fanaˈo ra tatou i te hau e te tahoê e vai ra i roto i to tatou utuafare pae varua no te mea te faatupu ra tatou i te mau hotu o te varua o te Atua. Ma te tahoêhia e te mau taairaa puai o te here, eita roa ˈtu tatou e manaˈo e ua faaruehia tatou e te Atua e to tatou mau taeae ia tupu te ati.—Gal. 6:10.
4 E fa e e auraa mau to to tatou oraraa. Te hiˈo ra tatou mai te hoê fanaˈoraa taa ê faahiahia te apitiraa i roto i te ohipa pororaa i te parau apî maitai na te ao nei. Te tautururaa ia vetahi ê ia fanaˈo i te mau taairaa maitatai e o te Atua e ia faaohipa i te haamoriraa viivii ore e o tatou, e horoa mai ïa i te oaoa maoro. E faahanahana ta tatou taviniraa, te taoˈa faito ore, ia Iehova e e mauruuru tatou i te tururaa i te haamoˈaraa i to ˈna iˈoa. E faatupu noa tatou i te hoê huru feruriraa maitai, ma te ite e e fatata to tatou tiaturiraa no nia i te hoê oraraa no a muri aˈe i te tupu.
5 E faaite anaˈe i to tatou mauruuru: Ia oaoa noa tatou i te mau haamaitairaa a Iehova, o te faariro mau ia tatou ei taata taoˈa rahi roa ˈˈe o te fenua nei! (Mas. 22:4) Na roto i te raveraa i te taime i te mau mahana atoa no te feruri hohonu i nia i te mea e vai ra ia tatou, e turaihia tatou ia haamauruuru ia Iehova no to ˈna here e to ˈna horoa maitai e ia tamau i te haamori ia ˈna anaˈe.