E ati to mua i te taata!
1 Te faaite maitai ra te Bibilia e te hinaaro ra Iehova ‘ia ora te mau huru taata atoa.’ Teie râ, eiaha e haamoe e ua taaihia te oraraa no a muri aˈe o te mau miria taata i to ratou huru i nia i te Atua ra o Iehova e i nia i to ˈna Basileia faaterehia e Iesu Mesia. Ua niuhia te huru oraraa ta te Atua e au i nia noa i “te ite i te parau mau.” (Tim. 1, 2:3, 4) Ma te faaite e e fatata te ino atoa i te faaorehia i nia i te fenua nei e te ao apî tia a te Atua i te haamauhia, te rave ra ïa tatou i te ohipa faaoraraa tei horoahia mai ia tatou ra.—Mat. 24:14; 28:19, 20; Roma 10:13-15.
2 No te aha mea ru mau? Ua horoa Iesu i te tahi mau faaararaa no nia i te hoê ati “aita ïa ati mai te matamehai mai o teie nei ao.” (Mat. 24:21) E taea i taua ati rahi ra i to ˈna taime faahiahia roa ˈˈe i Aramagedo. (Apo. 16:16) I rotopu i te taata e rave rahi aitâ i tavini ia Iehova o te ore paha e fanaˈo i te ora mai te peu e e patoi ratou i te parau apî maitai, te vai ra te tahi mau melo o to tatou utuafare, to tatou mau hoa tapiri, to tatou mau hoa rave ohipa, to tatou mau hoa haapiiraa e te feia ta tatou i matau. Ta tatou râ tapitapi, o te pororaa ïa i ‘te mau huru taata atoa,’ mai te Atua i faaite i to ˈna here i te huitaata taatoa nei ma te pûpû i ta ˈna Tamaiti o Iesu Mesia ei hoo no te taatoaraa. (Ioa. 3:16) E tia ia tatou ia tutava ma te itoito i te titau manihini i te feia rahi roa ˈˈe ia horo i te vahi haapuraa a te Atua. Na roto i te rohiraa i te apiti i roto i te pororaa, eita ïa tatou e faahapahia ia pohe te hoê taata.—Ezek. 33:1-7; Kor. 1, 9:16.
3 Eaha ta tatou fa? Te haamataratara ra te Parau a te Atua i te faufaaraa o te ohipa pororaa. Mai ta te aposetolo Paulo i faaite, “te faahepo nei hoi te here o te Mesia ia matou” ia ora ia au i te mau eˈa o te Atua. (Kor. 2, 5:14, MN) Oia atoa, e haamanaˈo pinepine Te Pare Tiairaa e e tia ia tatou ia poro. E horoa tamau Te taviniraa o te Basileia i te tahi mau aˈoraa nafea tatou ia poro. E faanahonaho te mau matahiapo i te ohipa e e faaitoito ia tatou ia apiti atu i roto. E titau manihini mai te tahi atu mau taata poro ia tatou ia poro e o ratou. E fanaˈo tatou e rave rahi mau manaˈo tauturu no te faaineine i ta tatou mau faaiteraa, no te pûpû i te mau vea e te tahi atu mau papai, no te rave i te mau hoˈi-faahou-raa e farerei, no te aratai i te mau haapiiraa Bibilia e no te faaohipa i te mau taime atoa no te horoa i te faaiteraa. E tauturu te reira mau mea atoa ia tatou ia naea te fa e faaora i te taata.—Kor. 1, 9:22, 23; Eph. 1:13.