E faaoromai anaˈe i roto i te taviniraa
1. E nafea Iehova e faaite noa ˈi i to ˈna faaoromai?
1 E mea faaoromai Iehova. (Exo. 34:6; Sal. 106:41-45; Pet. 2, 3:9) Te hiˈoraa maitai roa ˈˈe o to ˈna faaoromai î i te here, o te ohipa pororaa o te Basileia ïa na te ao nei. Ua haa Iehova e te huitaata fatata e 2 000 matahiti i teie nei, e te faatae noa ra oia i te feia aau haavare ore ia ˈna ra. (Ioa. 6:44) E nafea tatou e pee ai i to Iehova faaoromai i roto i ta tatou taviniraa?
2. A poro ai, e nafea tatou e faaite ai i te faaoromai?
2 Te pororaa na te mau fare: E pee tatou i to Iehova faaoromai ma te poro “aore e mahana tuua” i te mau tuhaa fenua aitâ te taata i faaite i te anaanatae. (Ohi. 5:42) Ma te faaoromai i te tâuˈa ore, te faaooo e te patoiraa. (Mar. 13:12, 13) Ma te tamau atoa i te ueue i te huero o te parau mau mea fifi anaˈe ia farerei i te taata anaanatae.
3. No te aha e mea tia ˈi ia faaoromai i roto i te mau farerei-faahou-raa e haapiiraa Bibilia?
3 Haapiiraa Bibilia: Eita tatou e nehenehe e haavitiviti i te tupuraa o te hoê tiare. E faaoromai râ tatou ma te atuatu i te reira. (Iak. 5:7) Hoê â huru i te pae varua, mea mǎrû te tupuraa. (Mar. 4:28) Mea fifi paha no te feia haapii ia faarue i ta ratou mau tiaturiraa hape aore ra peu aita e tu ra i te Bibilia. Eiaha tatou e haavitiviti i to ratou haereraa i mua ma te faahepo atu ia taui. E faaoromai anaˈe. E nehenehe ïa te varua o te Atua e ohipa i nia i te aau o te piahi.—Kor. 1, 3:6, 7.
4. E nafea te faaoromai e tauturu mai ai ia horoa i te faaiteraa i to tatou fetii?
4 Fetii e ere i te Ite: Noa ˈtu e te hinaaro mau ra tatou ia haapii to tatou fetii i te parau mau, e faaoromai anaˈe. E tiai i te taime tano no te faaite atu i to tatou faaroo ma te ara râ eiaha e faarahi roa. (Koh. 3:1, 7) I teie râ taime, na to tatou hiˈoraa e paraparau no tatou. E e vai ineine noa tatou i te faaite i to tatou faaroo ma te mǎrû e te faatura. (Pet. 1, 3:1, 15) E manuïa roa ˈtu â ta tatou taviniraa ia faaoromai tatou. E e faaoaoa te reira i to tatou Metua i te raˈi.