“Ia ravehia te mau mea atoa no te patu”
1 I roto i to tatou mau taairaa e to tatou mau taeae e mau tuahine, e tia ia tatou ia rave i te mea maitai no te patu ia ratou. Oia hoi, e tia ia tatou ia hinaaro mau e paruru i to ratou huru pae varua. Mai te peu e ta tatou ohipa, o te hooraa ˈtu ïa i te hoê taoˈa aore ra i te hoê ohipa, ia ara ïa tatou eiaha hoê o ta tatou mau ohipa e faaturori i to tatou mau taeae.—Kor. 2, 6:3; Phil. 1:9, 10.
2 Ua faaô vetahi i roto i te tahi mau tapihooraa rau ma te manaˈo e e itea mai ia ratou te tahi mau taata aimamau i rotopu i te tahi atu mau Kerisetiano. E faaitoito vetahi mau taiete i to ratou mau tia ia hiˈo e tia ˈi i te taata taitahi, oia atoa to ratou mau hoa faaroo, mai te hoê taata aimamau. Ua faanaho te tahi mau taeae i te mau apooraa rarahi a te mau Ite no te ani ia ratou ia faaô mai i roto i te hoê ohipa tapihoo. E faatianiani vetahi i ta ratou tauihaa hoo ma te hapono te tahi mau taoˈa, te tahi mau buka faaiteiteraa, te tahi mau haamaramaramaraa i nia i te Internet aore ra te tahi mau ripene haruharu i te tahi mau hoa faaroo. E tia anei i te hoê Kerisetiano ia imi i te apî i nia i to ˈna mau taeae e mau tuahine pae varua no te mea e mau taairaa teotaratia to ˈna e o ratou? Eita ïa!—Kor. 1, 10:23, 24, 31-33.
3 E tia i te mau taeae ia vai ara noa: E ere te auraa e eita te hoê taeae e nehenehe e faaau i te ohipa e te tahi atu taeae. E ohipa te reira na te taata taitahi. Teie râ, e faanaho vetahi i te tahi mau opuaraa tapihoo o te faaitoito i te nounou, e e ani ratou i te tahi mau hoa ia apiti mai e o ratou aore ra ia tuu i te moni i roto i ta ratou ohipa. E rave rahi ohipa o te topatari, e e pau ta te feia apiti ehia rahiraa moni. Noa ˈtu e e turaihia te feia apiti i roto i te opuaraa e te hinaaro ia noaa oioi te moni, eiaha te taata opua e manaˈo e aita ta ˈna e hopoia. E tia ia ˈna ia feruri maite i te mau faahopearaa ta te ohipa e faatupu i nia i te ea pae varua e pae tino o to ˈna mau taeae ia topatari te reira. Ia vai ara maite noa iho â râ te feia e hopoia teotaratia ta ratou, nafea ratou ia imi i to ratou oraraa, no te mea te faatura mau ra e te tiaturi rahi ra te tahi atu mau taata ia ratou. E mea ino ia faahape i taua tiaturi ra. E nehenehe te hoê taeae o te ere i te faatura o vetahi ê e ere i ta ˈna mau fanaˈoraa taa ê o te taviniraa.
4 Ta tatou fa, ‘ia ravehia ïa te mau mea atoa no te patu.’ (Kor. 1, 14:26, MN) Eiaha roa ˈtu tatou e rave i te tahi mau ohipa tapihoo i roto i te amuiraa aore ra e faaitoito i te reira. Aita roa ˈtu hoi te reira e tuati ra e te mau tumu Bibilia e putuputu ai tatou.—Heb. 10:24, 25.