Nafea ia mau papu i roto i te faaroo?
1 Mai te taime a vai ai tatou i roto i te faanahonahoraa a Iehova, ua oaoa rahi tatou i to tatou haereraa i mua i te pae varua. E tia râ ia tamau noa tatou i te na reira ia ‘aahia, ia patuhia, e ia papu tatou i roto i te faaroo.’ (Kol. 2:6, 7) Ua ruperupehia te rahiraa o tatou i te pae varua, ua atea ê râ vetahi no te mea aita ratou i “mau papu [i roto] i te faaroo.” (Kor. 1, 16:13; MN) Nafea ia paruru ia tatou i teie fifi?
2 Te tahi mau ohipa pae varua tamau: E haamau anaˈe i te hoê porotarama maitai no te mau ohipa i te pae varua i roto i te faanahonahoraa a Iehova, no te mea e haamâha rahi te reira i to tatou mau hinaaro i roto i taua tuhaa ra. E tauturu te mau faaitoitoraa e fanaˈohia i te mau putuputuraa a te amuiraa e i te mau tairururaa ia paari e ia papu tatou i te pae varua, mai te peu iho â râ e e tae pinepine mai tatou no te ooti i te mau haamaitairaa. (Heb. 10:24, 25) Ia haapao tamau tatou i te taime no te taio i te Bibilia, Te Pare Tiairaa e te A ara mai na! e tae noa ˈtu te mau buka o te hiˈopoa ra i te “maa etaeta” a te Parau a te Atua, e mau maitai roa to tatou mau ‘aˈa’ pae varua. (Heb. 5:14) E haamau anaˈe ïa i te tahi mau fa pae varua e e ohipa anaˈe ma te haapao maitai; e vai te mau haamaitairaa e a muri noa ˈtu.—Phil. 3:16.
3 Te tauturu a te mau hoa paari: E faahoa atoa anaˈe i te mau melo paari i te pae varua o te amuiraa. E haamatau maitai aˈe anaˈe i te mau matahiapo, inaha e nehenehe mau ratou e haapuai ia tatou. (Tes. 1, 2:11, 12) E farii anaˈe i te mau aˈoraa aore ra te mau manaˈo atoa ta ratou e nehenehe e horoa mai. (Eph. 4:11-16) E hinaaro atoa te mau tavini tauturu ia mau papu to ratou mau hoa i roto i te faaroo; eiaha ïa e taiâ i te imi i ta ratou mau faaitoitoraa.
4 Te hinaaro ra anei outou i te tauturu i roto i te taviniraa? A tauaparau ïa i te mau matahiapo e a ani i te tauturu. E fanaˈo paha outou i te porotarama “Te tauturu nei te mau pionie ia vetahi ê.” No bapetizo noa ˈtura anei outou? E turai te haapiiraa i te buka ra Notre ministère e te faaohiparaa i te mau aˈoraa i roto ia paari outou i te pae varua. E tamarii anei ta outou? Mai te peu e e, a haapuai tamau i to ratou huru pae varua.—Eph. 6:4.
5 Ma te aˈahia e te vai papu i roto i te faaroo, e fatata roa ïa tatou ia Iehova e e mauruuru tatou i te auhoaraa mahanahana o to tatou mau taeae e tuahine. Maoti te reira, e nehenehe ïa tatou e faaruru i te mau aroraa a Satani e e haapaari i to tatou tiaturiraa i te hoê oraraa mure ore no a muri aˈe.—Pet. 1, 5:9, 10.