Te poro ra tatou i te parau apî maitai
1 E haamaitairaa faahiahia ta tatou, te hopoiraa ïa i “te evanelia o te maitai ra.” (Roma 10:15) E poroi tamahanahana ta tatou e faaite i te mau taata o te teimaha ra i te mau fifi e o te haaparuparu ra. Nafea râ tatou e nehenehe ai e tauturu ia ratou ia taa e te pûpû ra tatou i te mau “parau oaoa e te maitai” no ratou?—Isa. 52:7.
2 A faaineine i te hoê poroi maitai: I roto i te taviniraa, e tapea te mau taata i te hoê huru maitai ia haafaufaa tatou i te mau mea maitatai. No reira, ia faaineine tatou i ta tatou mau faaiteraa e ia tuatapapa tatou i te papai ta tatou e pûpû atu, e tia ia haamatara tatou i te mau tuhaa maitatai o te poroi. Ia faaite tatou i ta tatou tiaturiraa niuhia i nia i te Bibilia ma te tiaturi papu e te aau tae, e ooti iho â tatou i te mau faahopearaa faaitoito mau.—Mas. 25:11.
3 A taa noa ˈi ia tatou ia faahiti mai te mau taata i to ratou peapea rahi i te ino-roa-raa o te mau tupuraa na te ao nei, e faaite tatou ia ratou e o te Basileia o te Atua te ravea mau o te fifi o te taata. Noa ˈtu e te paraparau ra tatou no nia i “te mahana tahooraa” a Iehova e fatata maira, e faataa tatou i te mau taata e faaroo mai e e “parau oaoa” iho â te reira “i te aau mǎrû ra.” (Isa. 61:1, 2) E nehenehe tatou e tamǎrû ia ratou na roto i te faaiteraa e e faahopearaa maitai roa ˈˈe to te mau mea atoa ta Iehova e rave ra e e faatupu mai te reira i te oaoa rahi roa ˈˈe i te pae hopea.
4 A faaite i te parau mau ma te oaoa mau: Ia ite te taata e mea oaoa tatou e te tauaparau ra tatou ma te tiaturi papu, e faaroo ohie mai ratou. Mai te peu e e faaite tatou i te hoê feruriraa maitai, e ite ïa ratou e te ‘oaoa ra tatou i te tiairaa.’ (Roma 12:12) E haapao maitai aˈe ïa ratou i te parau apî maitai. Aita e feaaraa, e tia ia tatou ia faaite i te hoê feruriraa maitai e ia oaoa i roto i te mau tuhaa atoa o ta tatou taviniraa.
5 Ei tavini no te parau apî maitai, aita tatou e faaara noa ra i to tatou taata-tupu. Na roto i ta tatou pororaa, te faaite ra tatou i te hoê tiaturiraa papu no te oraraa maitai roa ˈˈe i teie nei e a muri aˈe. (Tim. 1, 4:8) E itehia to tatou feruriraa maitai i roto i ta tatou mau parau, e tauturu ïa te reira i te mau taata e faaroo mai ia farii i te parau apî maitai. Ia haapao maitai tatou i ta tatou mau parau oia atoa ta tatou huru paraparau, e faaitoito ïa tatou i te mau taata haavare ore ia farii i te parau apî maitai ta tatou e poro ra.