Te ravea no te faatupu i te aravihi no te haaferuri
1 Te hoê auraa o te ihoparau “haaferuri, MN” o te “faaohiparaa ïa i te mau haapapuraa, te mau tumu no te haapapu i te manaˈo o te hoê taata.” Ia maitai atu â ta tatou taviniraa, e tia ia tatou ia haamaitai i to tatou aravihi no te haaferuri e te feia ta tatou e paraparau ra. (Ohi. 17:2-4) Nafea râ ia faatupu i te aravihi no te haaferuri?
2 Na mua, e feruri hohonu: Ia haapii tatou i te mau parau mau o te Bibilia, mea faufaa ia feruri i nia i te mea ta tatou e haapii ra. Mai te peu e e mea fifi roa te hoê manaˈo, e rave anaˈe ïa i te taime no te rave i te mau maimiraa e e feruri hohonu anaˈe i nia i te mau pahonoraa i iteahia mai. E tamata anaˈe i te taa maitai eiaha noa i te mau faataaraa i horoahia, oia atoa râ i te mau haapapuraa o te Bibilia e paturu ra i te reira.
3 Te hoê pororaa faaineine-maitai-hia: E feruri anaˈe nafea ia faataa i te parau mau i te mau taata huru rau atoa. No te faaara i te anaanatae o te taata ta tatou e paraparau ra, e tia ia tatou ia ui i te hoê uiraa o te haaferuri. E imi anaˈe i te hoê parau o te nehenehe e faatuati e te hoê manaˈo Bibilia ta tatou e faaohipa no te haaferuri. E manaˈo anaˈe i te mau patoiraa ta tatou e nehenehe e farerei e mea nafea ia pahono atu i te reira. E maiti anaˈe i roto i te papai ta tatou e pûpû ra i te hoê manaˈo faufaa e tano no te aparauraa.
4 E pee anaˈe i te hiˈoraa o Iesu: I te pae o te haaferuriraa ia au i te mau Papai, o Iesu to tatou Hiˈoraa. E hiˈopoa anaˈe i ta ˈna haapiiraa ma te rave faahou mai i te aamu i roto i te Luka 10:25-37. A tapao na i te mau taahiraa avae: 1) huti i te ara-maite-raa i nia i te mau Papai ia pahonohia i te mau uiraa; 2) titau manihini i te taata ia faaite i to ˈna manaˈo e ia haapopou ia ˈna no ta ˈna mau parau e au; 3) haapapu e e haamatara te taairaa o te uiraa e te irava o te mau Papai; 4) faaohipa i te hoê hiˈoraa o te haaputapû i te mafatu ia nehenehe te taata ia taa maitai i te auraa o te pahonoraa.—Hiˈo i Te Pare Tiairaa o te 1 no Mati 1986, mau api 27-28, mau par. 8-10 (Farani).
5 E faaohipa anaˈe i te mau mauhaa e vai ra ia tatou: Ua nenei taa-ê-hia iho â te buka ra Comment raisonner à partir des Écritures no te pororaa. E tauturu ta ˈna mau faaomuaraa parau, ta ˈna mau pahonoraa i te mau patoiraa e ta ˈna mau haapapuraa ia tatou ia faatupu i te aravihi no te haaferuri. E mauhaa faufaa teie buka o te tia ia tatou ia afai noa i roto i te taviniraa e eiaha tatou e haamarirau i te faaohipa ia haamata tatou i te hoê tauaparauraa Bibilia. E hiˈo faahou anaˈe i te mau api 7-8 no te faaohipa maitai atu â i ta ˈna mau ravea.
6 Maoti te aravihi o te haaferuriraa e manuïa roa ˈi tatou i roto i ta tatou pororaa e i roto i ta tatou haapiiraa. E hopoi mai te reira e rave rahi haamaitairaa no te feia poro e te mau taata ta tatou e farerei ra i roto i ta tatou taviniraa.