Pahonoraa i ta outou mau uiraa

◼ Mea tia anei ia popou ia faaarahia e ua faahoˈihia mai o mea?

Ma te aroha, te faaite ra te Atua ra o Iehova i roto i te mau Papai nafea te feia rave hara tatarahapa e nehenehe ai e ite i ta ˈna farii maitai e e hoˈi mai i roto i te amuiraa Kerisetiano. (Sal. 51:12, 17) Ia tupu te reira, te faaitoitohia ra tatou ia haapapu i to tatou aroha i tei tatarahapa mau.—Kor. 2, 2:6-8.

Teie râ, noa ˈtu to tatou oaoa ia faahoˈihia mai te hoê fetii aore ra te hoê tei matauhia e tatou, e tia ia rave i te hoê haerea tano i te taime e faaarahia ˈi i te amuiraa e ua faahoˈihia mai o ˈna. No nia i te reira, teie ta Te Pare Tiairaa o te 1 no Atopa 1998 e faaite ra i te api 17: “E tia râ ia tatou ia haamanaˈo e aita te rahiraa i roto i te amuiraa e taa maitai ra i te mau huru tupuraa taa ê o tei aratai i te hoê taata ia tiavaruhia aore ra ia faahoˈihia mai. Hau atu â, te vai ra paha vetahi o tei huru ê aore ra o tei mauiui—peneiaˈe i te hoê area taime roa—no te hara a te taata i tatarahapa. Ia au i teie mau manaˈo, ia faaarahia mai e ua faahoˈihia mai o mea, mea tano aˈe ia faaite tatou i ta tatou mau tapao farii popou i te hoê taime e nehenehe tatou e na reira e o ˈna anaˈe.”

Noa ˈtu e te oaoa rahi ra tatou ia hoˈi mai te hoê taata i te parau mau, e ere i te mea tano ia popou i te taime e faaarahia ˈi te reira i te amuiraa.