Aita anei tatou i faaroo aˈena i te reira?
1 Papu maitai e e! I roto i ta ˈna Parau, te faahiti pinepine nei Iehova e rave rahi mau manaˈo ia faufaahia ta ˈna mau tavini. Ua faahiti pinepine Iesu i te mau mea ta ˈna i haapii no nia i te mau tuhaa rau o te Basileia. Ia aparau ratou i te mau Kerisetiano e mau papu ra i roto i te parau mau, e faahaamanaˈo tamau te mau aposetolo i taua noâ mau tumu parau pae varua ra.—Roma 15:15; Pet. 2, 1:12, 13; 3:1, 2.
2 I to tatou nei tau, te ara nei te faanahonahoraa a Iehova ia aparau-tamau-hia te mau tumu parau faufaa i te mau putuputuraa o te amuiraa. Te vai ra vetahi mau papai tei haapiihia e rave rahi taime. E ere roa ˈtu i te mea faufaa ore te faaroo-faahou-raa i tei faaroo-aˈena-hia e tatou!
3 Mea faufaa te faahiti-noa-raa: E faahohonu te mau faahaamanaˈoraa a Iehova i to tatou ite i te mau mea, e faaaano i to tatou huru hiˈoraa e e haapaari i to tatou hinaaro e faaea i roto i te hororaa Kerisetiano. (Sal. 119:129) Ia hiˈo faahou mai tatou i te mau ture e te mau faaueraa tumu a Iehova, e au ra ïa e te hiˈo ra tatou i roto i te hoê hiˈo. E tauturu te reira ia tatou ia hiˈo maite ia tatou e ia patoi atu i to tatou hinaaro e riro ei “taata e moina.”—Iak. 1:22-25.
4 Ia ore tatou e hiˈo tamau i te mau parau mau ta tatou i haapii, e ohipa mai vetahi mau mea i nia i to tatou mafatu. E horoa mai te mau faahaamanaˈoraa a te Atua i te puai no te patoi i te mau umeraa viivii o te ao a Satani. (Sal. 119:2, 3, 99, 133; Phil. 3:1) E turai te mau faahaamanaˈo-tamau-raa no nia i te tupuraa o te mau opuaraa a te Atua ia tatou ia “vai ara.” (Mar. 13:32-37, MN) E tauturu te faahiti-noa-raa i te mau parau mau Bibilia ia vai noa tatou i nia i te eˈa e aratai ra i te ora mure ore.—Sal. 119:144
5 Nafea ia faufaahia: E tia ia ‘faafariu tatou i to tatou aau i [te mau faahaamanaˈoraa] a te Atua.’ (Sal. 119:36; MN) Ia hiˈopoahia te hoê tumu parau matauhia e tatou i te putuputuraa, e tia ia faaineine ia tatou, ia taio i te mau irava e horoahia ra e ia feruri nafea ia faaohipa i te mau aˈoraa. Eiaha roa ˈtu e haafaufaa ore i te hiˈo-faahou-raa no te Haapiiraa o te Taviniraa Teotaratia ma te manaˈo e eita tatou e faufaahia i te reira. (Luka 8:18) E ara anaˈe ia ore tatou e riro mai ei feia faaroo atâ no te mea e faahiti-pinepine-noa-hia te mau parau mau tumu i roto i te mau putuputuraa.—Heb. 5:11
6 E tahoê anaˈe i te mau manaˈo hohonu o te papai salamo e: “Te oaoa nei au i te eˈa ta oe i faaite maira, e iti hua to te mau taoˈa atoa ra.” (Sal. 119:14) Parau mau, ua faaroo aˈena tatou i teie mau haapiiraa faufaa roa na mua ˈˈe, e e faaroo faahou â tatou i te reira no te mea ua ite maite Iehova e mea hinaarohia e tatou e faaroo i te reira!