Eaha ta outou e parau i te hoê ati Iuda?
1 I te senekele matamua, e rave rahi mau “tamarii a Iseraela” tei farii maitai i te pororaa a Iesu e a ta ˈna mau pǐpǐ. (Ohi. 10:36) Oia atoa i to tatou nei tau, e rave rahi mau ati Iuda aau rotahi e farii nei i te parau mau ma to ratou mafatu atoa, eiaha noa i Iseraela, i te tahi atoa ˈtu râ mau fenua e rave rahi. Te hinaaro ra anei outou e faatupu i te mau aparauraa o te manuïa aˈe e te feia o te haapaoraa ati Iuda? E tauturu te mau manaˈo i muri nei ia outou ia poro ma te aravihi, i te mau ati Iuda e haapaoraa ta ratou aore ra aita.
2 Te pororaa i te mau ati Iuda e haapaoraa ta ratou: E haamanaˈo maite anaˈe e mea pinepine, e tapitapi rahi aˈe te mau ati Iuda e haapaoraa ta ratou i te haapao i te mau tutuu a te mau rabi eiaha râ i te faataa i te mau haapiiraa tumu taa maitai. Oia mau, ia ratou, hoê â mana to te tutuu e to te mau Papai. Eita paha ïa ratou e anaanatae i te mau aparauraa i nia i te mau tumu parau Bibilia hohonu. E manaˈo pinepine atoa ratou e e buka Kerisetiano te Bibilia. No reira, mea au aˈe e faaohipa i te mau parau mai teie “te mau Papai Hebera,” “te Torah” aore ra “te mau Papai.” Mea maitai roa te buka rairai ra Connaîtronsnous un jour un monde sans guerre? faaineine-taa-ê-hia na te mau ati Iuda.
3 Eaha te mau tumu parau e huti i te ara-maite-raa o te hoê ati Iuda e haapaoraa ta ˈna? E tiaturi te mau ati Iuda i te hoê Atua otahi o te tapitapi maite i te taata. E manaˈo atoa ratou e e faaô mai te Atua i roto i te mau ohipa a te taata. E nehenehe e haamau i te hoê tauaparauraa au maitai i nia i taua mau manaˈo ra. Hau atu â, ua ite maite te rahiraa o te mau ati Iuda i te mau mauiui ta to ratou nunaa i farerei i roto i te Piti o te Tamaˈi Rahi. E ui maere ratou no te aha te Atua i faatia ˈi i taua mau ohipa tia ore ra e afea te ino e ore ai. E nehenehe mau â ta tatou e pahono i teie mau uiraa na roto i te faahitiraa, ei hiˈoraa, i ta to tatou mau taeae i farerei i te tau o te Holocauste.
4 Parau mau, no te ore e faariri faufaa ore noa i te taata ta tatou e paraparau atura, mea maitai aˈe eiaha e faahiti oioi roa i te parau o te Mesia. Area râ, e nehenehe e tauaparauhia te tuhaa ta Mose i rave i roto i te aamu o Iseraela e e ani i te taata ra e te manaˈo ra anei oia e e au â ia faaohipahia te mau haapiiraa a Mose i teie nei tau. Mai te peu e e tano ia paraparau no nia i te Mesia, e nehenehe e haamata na roto i te taioraa i te Deuteronomi 18:15: “E faatupu to Atua ra o Iehova i te hoê peropheta na oe i rotopu ia oe ra, i te hoê i te mau taeae no oe ra, mai ia ˈu nei; oia ta outou e faaroo.” A ani i te taata ra o vai ta Mose e manaˈo ra i to ˈna faahitiraa i te peropheta mai ia ˈna. A rave atu ai i te tahi mau manaˈo no roto mai i te buka rairai ra Un monde sans guerre, api 14, mau paratarapha 17 e 18.
5 E huru hiˈoraa ê to te mau ati Iuda aita e haapaoraa: E ere o te mau ati Iuda atoa te farii i te mau haapiiraa a te haapaoraa ati Iuda. E rave rahi mau ati Iuda e taa ê to ratou huru feruriraa i to te haapaoraa. E tapitapi rahi aˈe ratou i te patururaa i te tiaraa ati Iuda taa ê, ma to ˈna hiroa tumu, ta ˈna iho tutuu e ta ˈna iho haapiiraa, eiaha râ te faaohiparaa i te haapaoraa ati Iuda. E mau agnostique te tahi mau ati Iuda aita e haapaoraa, te vai atoa ra o te ore e tiaturi i te Atua. E iti roa te manuïaraa ia faahiti-rahi-hia te mau papai Hebera i te omuaraa iho â. Mea maitai aˈe e haamata i te tauaparauraa mai ta tatou e rave nei e te hoê taata e ore e tiaturi. E nehenehe, ei hiˈoraa, e faaite i te huru ohie ia faaohipa i te Bibilia i to tatou nei tau. Mai te peu e eita te taata ra e tiaturi e mea faauruahia te Bibilia, mea faufaa te tahi mau manaˈo o te buka rairai ra Un monde sans guerre, i roto iho â râ i te tuhaa e haamata i te api 3, “La Bible: inspirée par Dieu?”
6 No te poro atu i te hoê ati Iuda, e nehenehe outou e parau atu e:
◼ “Ua farerei aˈena te rahiraa o tatou i te oto o te ereraa i te hoê taata here. Ia au i to oe manaˈo, eaha te tupu i nia ia tatou ia pohe tatou? A vaiiho i te taata ia pahono mai. A faaite atu ai i te tumu parau tarenihia “Que sont la mort et l’âme?” i te api 22 o te buka rairai ra Un monde sans guerre. E faaau te reira i ta te mau Papai e parau ra e ta te mau rabi e haapii ra no nia i te oraraa i muri aˈe i te pohe. A faahoro atu ai i te paratarapha 17, api 23, e a faaite atu e, ia au i te mau Papai, e faatiahia mai tei pohe i nia i te hoê fenua paradaiso. A pûpû atu i te buka rairai. No te faaineine i te hoˈi-faahou-raa e farerei, e nehenehe outou e faaite e i tiaturi na te patereareha ra o Ioba i te tia-faahou-raa. A faaite i te mau irava e faahoro ra i roto i te mau Papai i te hopea o te paratarapha 17 e a pûpû atu e e hoˈi faahou mai outou e tauaparau i te reira.
7 Te faatia ra te mau buka a Mataio, Mareko, Luka e Ioane, e te Ohipa atoa, e ua farii maite te tahi mau ati Iuda i te parau mau e ua faaohipa ratou i te reira. Te haamatara noa râ Iehova i te eˈa e aratai i te ora mure ore i teie mahana. E nehenehe â te mau ati Iuda aau rotahi e rave rahi e haapii e ia ite ia Iehova, te Atua mau ra, e ia ora ratou e a muri noa ˈtu i roto i te ao apî a te Atua.—Mika 4:1-4.