Nafea ia oaoa ˈtu â i te mau putuputuraa
1 Mea faufaa te mau putuputuraa no to tatou maitairaa i te pae varua. Ua taai-roa-hia to tatou oaoa i te reira i ta tatou e rave na mua ˈˈe, i te putuputuraa e i muri aˈe. Nafea ia tamau noa i te oaoa i te taeraa mai i te mau putuputuraa e i te tautururaa ia vetahi ê ia hoê â to ratou manaˈo?
2 Na mua ˈˈe i te mau putuputuraa: Ua taai-rahi-hia te oaoa ta tatou e fanaˈo i te mau putuputuraa i ta tatou faaineineraa. Ia faaineine maitai tatou, e ohie roa ˈtu ïa tatou i te faaroo maite e i te apiti. Hau atu â, e tia ia tatou ia faaineine maitai i te mau tuhaa ohipa atoa e horoahia na tatou. Ta tatou mau tapao, o te horoa-papu-mau-raa ïa i te mau manaˈo, ia au i te mau faaueraa, e te faanaanatae-tamau-raa i te feia e faaroo ra. E tia ïa ia tatou ia faaineine maitai. Ia faariro tatou i te mau putuputuraa ei taime oraora e te faufaa no te taatoaraa, e ite-papu-hia to tatou haereraa i mua e e rahi atu â ïa to tatou oaoa.—Tim. 1, 4:15, 16.
3 I te mau putuputuraa: Ia pahono tatou i te mau putuputuraa, e oaoa ˈtu â tatou. Ia titauhia te feia e faaroo ra ia apiti mai, e tia i te melo taitahi o te amuiraa ia hiˈo e ua horoahia ia ˈna i te hoê tuhaa ohipa. E pinepine te mau pahonoraa poto e te papu i te mea maitai roa ˈˈe. E nehenehe te mau faatiaraa poto maitatai e riro ei faaitoitoraa; eiaha ïa tatou e haamarirau i te faatia i te mau taime atoa e titau ai te porotarama. (Mas. 15:23; Ohi. 15:3) Ia vauvau tatou i te hoê tuhaa o te hoê putuputuraa, e paraparau anaˈe ma te anaanatae e te tiaturi; e faahiti anaˈe i te mau manaˈo anaanatae, papu e te ohie.
4 I muri aˈe i te mau putuputuraa: E faahiti anaˈe te tahi i te tahi i te hoê parau maitai, te hoê aroharaa auhoa, e te tahi mau manaˈo i hiˈopoahia i te putuputuraa: e faufaahia ïa tatou paatoa. E faaite anaˈe i to tatou oaoa i te iteraa e te apiti ra te mau taurearea, te feia paari e te mau taata apî; e haapaari te reira i te here i rotopu i te mau taeae e te mau tuahine. Maoti i te faahapa ia vetahi o te mairi ra i te mau putuputuraa, e tufa anaˈe ia ratou i to tatou oaoa i te taeraa mai, e faaitoito te reira ia ratou ia haere mai.—Heb. 10:24, 25.
5 Eiaha tatou e faaere ia tatou i taua faanahoraa faufaa ra: e faatupu mai te reira i te hoê aitauiraa i te faaitoitoraa. (Roma 1:11, 12) Ia tutava maite tatou e ma te aau rotahi, e tapea ïa tatou i to tatou oaoa i te taeraa mai i te mau putuputuraa Kerisetiano.