E tupu roa ino te Parau tohu a te Atua!
1 Ua anaanatae noa iho â te mau Ite no Iehova i te mau parau tohu o te Bibilia. Ua oaoa ïa tatou i te iteraa e teie te manaˈo tumu o te Tairururaa Mataeinaa o teie matahiti “Te Parau tohu a te Atua.” Ua ru tatou i te ite i te “maa i te hora mau ra” ta Iehova i faataa na tatou. (Mat. 24:45) Aita tatou i tatarahapa aˈe.
2 Te mau manaˈo faufaa o te tairururaa: I te Mahana pae, te vai ra te hoê tatararaa anaanatae roa o te faatiaraa o te faahuru-ê-raa i roto i te oreroraa parau tumu “A haapao maitai i te Parau tohu a te Atua.” (Mat. 17:1-9) Ua haamatara te reira e te ora nei tatou i teie nei i te omuaraa o te tau hanahana roa ˈˈe, no te mea ua piri roa ˈtu â tatou i te tau hopea e to mua noa mai te haamauraa o te faanahoraa apî! Te hoê ravea faufaa no te haapao maite i te Parau a te Atua, o te taio-tamau-raa ïa i te reira. Ua pûpû mai te oreroraa parau tatuhaahia “A oaoa i te taioraa i te Parau a te Atua” i te tahi mau manaˈo tauturu ia riro ta tatou taioraa Bibilia ei mea faufaa aˈe e te au aˈe.
3 I te avatea Mahana maa, ua hiˈo faahou mai tatou i te mau tumu e haapapu ai tatou e te ora nei tatou i te mau mahana hopea. Te haamanaˈo ra anei outou? I te poipoi Sabati, ua haamatara-roa-hia ˈtu â te parau tohu a Habakuka i to tatou iteraa e te tuea roa ra to tatou tau i to te peropheta e e fatata te mau ohipa taa ê mau i te tupu mai ia haamou Iehova i te feia iino e ia faaora oia i te feia parau-tia. Ua papu anei ia outou i te manaˈo faufaa o te darama Bibilia no nia ia Iakoba e o Esau? E tia ia tatou ia imi ma te itoito i te mau haamaitairaa a Iehova e ia patoi atu i te anaanatae ore e te tâuˈa ore.
4 Te hoê buka apî anaanatae: Auê te oaoa i to tatou fanaˈoraa i te buka apî ra Prêtons attention à la prophétie de Daniel! Mea papu roa e ua haamata aˈena outou i te taio i taua buka anaanatae ra. I to ˈna faaiteraa i te reira, ua faahiti te taeae orero e: “Taa ê atu tau tuhaa rii, ua tupu te mau parau tohu atoa e vai ra i roto i te buka Daniela.” Aita anei te reira e haapapu ra e e anotau ru teie to tatou?
5 Ua haapuai rahi mau te porotarama o teie tairururaa ia tatou ia tiaturi e e tupu te mau parau tǎpǔ atoa a te Atua ta tatou e tiai noa ra. Ua faaitoitohia ïa tatou ia tamau noa i te faaite i te parau tohu a te Atua i to tatou taata-tupu!