Eaha ta outou e parau i te hoê Hindu?
1 Mai ta outou paha i ite, e rave rahi Hindu i rotopu i te huiraatira i te mau fenua e rave rau. No reira, ia tae iho â i te hoê taime, e farerei outou i te hoê Hindu i roto i te pororaa. Nafea outou i roto i taua tupuraa ra?
2 A haamanaˈo i te mau manaˈo i muri nei: Te parau nei te mau mitionare e poro pinepine ra i te mau Hindu e e ere i te mea faufaa ia tuatapapa hohonu i te haapaoraa Hindu. Ma te faaite i te parau mau ma te ohie e ma te aravihi noa, e faatupu pinepine tatou i te anaanatae. A ani na mua ia paraparau i te upoo utuafare. Mai te peu e e farii maitai oia, e ohie roa ïa ia tauaparau i te tahi atu mau melo utuafare. I te haamataraa, eiaha outou e parau e te afai maira outou i te hoê poroi maitai aˈe i te mau tiaturiraa o te taata e faaroo ra aore ra te hinaaro ra outou e tauaparau i nia i te Atua mau hoê ra aore ra i nia i te tahi mau papai moˈa tahito roa ˈˈe. I te mea e rave rahi Hindu o te hiˈo ra i te Bibilia ei buka no te pae tooa o te râ, e nehenehe outou e haapaiuma i taua manaˈo oti noa ra ma te faataa e aita oia e turu ra i te ohipa haruraa fenua, e te hau-ê-raa o te hoê nunaa i te tahi atu.
3 A faaohipa i te mau mauhaa tano maitai: Ua nenei-taa-ê-hia e piti buka rairai no te mau Hindu. Ua neneihia te buka rairai ra Pourquoi adorer Dieu en amour et en vérité? na roto i te mau reo Gujarati e Pendjabi. Te buka rairai ra Nos problèmes—Qui nous aidera à les résoudre? tei neneihia na roto 11 reo Inidia ê atu. Te vai ra teie nau buka rairai na roto i te reo Farani. Ua faaite atoa te mau buka rairai ra “Inaha, te faaapî nei au i te mau mea atoa nei” e Te haapao mau ra anei te Atua ia tatou? i to raua aravihi i roto i te pororaa i te mau taata e tiaturiraa Hindu to ratou. E mau mauhaa aravihi atoa te buka rairai ra Titau e te buka ra Te ite no te faatere i te mau haapiiraa Bibilia.
4 A faatano i te aparauraa: E ere i te mea fifi ia ite i te faatano i te aparauraa e te mau Hindu. Te tiaturi ra ratou e te ora nei tatou i te hoê tau ua tae te ino i to ˈna faito teitei roa ˈˈe e faaore te Atua i te mau fifi o te ao nei na roto i te hoê ati rahi o te apitihia mai e te hoê anotau o te parau mau. Mea ohie ia ite i te taairaa i rotopu i taua mau tiaturiraa ra e te mau haapiiraa o te Bibilia no te anotau hopea, te ati rahi e te ao apî i mua nei. I te mea e te hiˈo ra te rahiraa o te mau Hindu i te oraraa mai te hoê anairaa o te mau fifi aita hoi e ravea, e anaanatae ratou i te mau tumu parau no nia i te oraraa utuafare, te ohipa ino, te ino ore e eaha te tupu i muri aˈe i te pohe. Teie e piti faahiˈoraa ta outou e nehenehe e faaohipa.
5 Teie te nehenehe e faaanaanatae i te hoê metua tane:
◼ “Te haere ra vau e farerei i te mau taata e haapeapea ra no te huru mau o te utuafare i roto e rave rahi mau fenua. Ia manaˈo oe, eaha te titauhia no te tahoê i te mau utuafare? [A vaiiho i te taata ia pahono.] Ua ite vetahi mau taata eaha ta te mau papai Hindu e parau ra no nia i te utuafare, aita râ ratou i faaau aˈenei i ta te Bibilia e faahiti ra no taua tumu parau ra. Te hinaaro nei au e taio atu ia oe i teie manaˈo i roto i te Kolosa 3:12-14.” I muri aˈe i te taioraa i te mau irava, a faaite i te taata e paraparauhia ra i te pene 15 o te buka ra Te ite e a parau atu e: “E oaoa vau i te taio maa taime rii ia oe i teie pene.”
6 E anaanatae mai paha te hoê taata apî maoti teie mau parau:
◼ “Papu maitai e te tiaturi ra oe i te Atua. Ia manaˈo oe, eaha te opuaraa a te Atua no tatou?” A vaiiho i te taata ia pahono. I muri iho, a taio i te Genese 1:28 e a parau atu e: “Ua î roa e rave rahi tuhaa fenua o te ao nei i te taata e te mau fifi. E tiaturi anei oe e te hinaaro ra te Poiete e tauturu ia tatou ia faatitiaifaro i to tatou mau fifi?” I muri aˈe i te faarooraa i te pahonoraa, e faaohipa anaˈe i te hoê papai e tano.
7 Te mau faahopearaa maitatai i noaa mai: Ua paraparau atu te hoê Hindu, e 22 matahiti to ˈna, i te hoê tuahine e poro ra i te matete e ua ani ia ˈna i te hoê haapiiraa Bibilia. Ua faataa oia ia ˈna e, e vau matahiti na mua ˈtu, ua faaroo oia i te hoê tauaparauraa i rotopu i to ˈna metua vahine e o ˈna. Ua putapû roa oia i te mau pahonoraa ohie a te Bibilia no te mau fifi o te huitaata nei, aita râ to ˈna metua vahine i anaanatae aˈe, manaˈo atura oia e mea apî roa oia no te anaanatae atu i te parau mau na nia i to ˈna iho manaˈo. Ei taata paari, te hinaaro ra oia e ite hau atu â i teie nei. Aita taua taata apî ra i haamâuˈa i to ˈna taime. I roto e 23 noa mahana, ua haapii oia i te buka ra Te ite e, e maha avaˈe i muri aˈe i to ˈna farereiraa i te tuahine i te matete, ua ani oia ia bapetizohia oia!
8 Ua haamata te hoê taeae i te haapii e te hoê Hindu tei farereihia i roto i te hoê pereoo auahi. Te fifihia ra to ˈna faaipoiporaa. Mea au atoa na taua taata ra e inu i te ava. Ua farii oia e ia haere mai te Ite e farerei ia ˈna i ǒ na no te hiˈopoa i te mau aˈoraa Bibilia no nia i te oraraa utuafare. Ua haaputapû te mau haapiiraa morare o te Bibilia ia ˈna, e ua farii oia i te haapii i te Bibilia. Ua haere ihora oia i te mau putuputuraa e to ˈna utuafare taatoa. I muri iho, ua paraparau ratou i te parau mau i to ratou mau hoa e mau fetii. I teie nei, e ono o taua mau taata ra tei farii i te parau mau.
9 Te hinaaro o te Atua, ‘ia ora ïa te taata atoa e ia noaa te ite [papu] i te parau mau.’ (Tim. 1, 2:4; MN) E tano atoa te reira i te mau tane e mau vahine e ere ta ratou i te haapaoraa Kerisetiano, mai te haapaoraa Hindu. Mai te peu e te vai ra te mau Hindu i ta outou tuhaa fenua, no te aha e ore ai e haere e farerei ia ratou i mua nei e e faaohipa vetahi mau manaˈo o teie nei tumu parau?