E te mau taurearea: a haafaufaa i ta outou tau haapiiraa
1 Eaha to outou manaˈo ia hoˈi faahou anaˈe outou i te haapiiraa ia hope te tau faafaaearaa? E hinaaro oioi anei outou i te haafaufaa i te hoê tau haapiiraa apî? E faaohipa anei outou i te mau taime atoa i te fare haapiiraa no te tufa i te parau mau i to outou mau hoa haere haapiiraa e i ta outou mau orometua haapii? Te manaˈo nei iho â matou e te hinaaro nei outou e rave i tei maraa ia outou i te fare haapiiraa.
2 A riro mai ei feia haere haapiiraa maitatai: Mai te peu e ua faaineine maitai outou ia outou ia haere outou i te haapiiraa e ia horoa outou i te tariˈa faaroo, e faufaahia outou i te mau haamaitairaa o te vai maoro. A hamani oioi i ta outou mau ohipa haapiiraa, eiaha râ e vaiiho i te reira ia haafifi i ta outou mau ohipa teotaratia.—Phil. 1:10.
3 A haamata i ta outou tau haapiiraa apî ma te taio i te vea iti ra Te mau Ite no Iehova e te haapiiraa. I muri iho, e tia ia outou aore ra to outou mau metua ia horoa i te hoê vea iti na ta outou mau orometua haapii tataitahi. A parau atu ia ratou e te vai ra te pahonoraa i ta ratou mau uiraa atoa. E tauturu te reira ia ratou ia taa maitai aˈe i ta outou mau faaueraa tumu e ta outou mau tiaturiraa, e e tahoê mai ïa ratou e o outou ia faaohipa anaˈe outou i te mau mea i haapiihia mai ia outou. Hau atu, e haapapuraa te reira ia ratou e te hinaaro nei outou e to outou mau metua e tahoê atu e o ratou, o te tauturu ra ia outou ia noaa te hoê haapiiraa maitai.
4 A riro mai ei mau Ite maitatai: No te aha e ore ai e faariro i te fare haapiiraa ei tuhaa fenua na outou no te pororaa faanaho-ore-hia.? I te roaraa o te tau haapiiraa i mua nei, te vai ra ia outou ra te mau taime otahi roa no te poro. Te vai ra ia outou ra te hoê ite pae varua faahiahia roa; ia haaparare outou i te reira ‘e ora ïa outou e te feia atoa e faaroo mai ia outou.’ (Tim. 1, 4:16) Ma te faaite-noa-raa i te hoê haerea kerisetiano maitai e te pororaa i te mau taime atoa e tano, e faufaahia ïa outou e vetahi ê atoa.
5 Ua poro te hoê taeae apî ma te faanaho-ore-hia i te mau hoa haere haapiiraa. Te vai ra i rotopu i te feia i farii maitai, te hoê Katolika, te hoê taata tiaturi ore i te Atua, o tei faaooo tamau nei i te feia e tiaturi nei i te Atua, e te hoê taurearea o tei puhipuhi i te avaava e o tei inu rahi. Ei faahopearaa, ua tauturu to tatou taeae apî 15 hoa haere haapiiraa ia pûpû ia ratou i te Atua e ia bapetizohia ratou!
6 No reira, te mau taurearea, a haapii e a poro maitai i roto i ta outou tuhaa fenua taa ê mau. E faufaa-rahi-hia ïa outou i ta outou tau haapiiraa.