E vai noa anei te avaˈe Atete i roto i te mau tabula?
1 Ua vai noa na te matahiti 1963 i roto i te mau tabula a te nunaa o Iehova. Ua ite anei outou eaha te tumu? I taua matahiti ra, ua naeahia hoê mirioni te numera o te feia poro na te ao nei. Ahiri e tei roto outou i te parau mau i taua taime ra, eita e ore e te haamanaˈo ra outou i to tatou oaoa i te iteraa e rave rahi feia ia poro i te poroi o te Basileia! I teie mahana, ua hau atu i te pae mirioni feia poro na te ao nei o te tufa nei i te parau apî maitai o te Basileia, e fatata e 2 000 i Polinesia nei. Teie râ, i te mau avaˈe atoa i ǒ tatou nei, aita tau hanere o tatou, te hoê numera au noa, e faahoˈi nei i te tabula no to ratou apitiraa ˈtu i roto i te taviniraa.
2 E faaruru anaˈe i te fifi: I te avaˈe Atete, te tutava nei tatou ia naeahia te hoê numera rahi roa ˈˈe o te feia poro i Polinesia nei i te mea hoi e mea matauhia e tau faafaaearaa haapiiraa i te mau matahiti atoa i roto i teie avaˈe. Mai te peu e e manuïa ta tatou mau tutavaraa, papu maitai ïa, e vai noa taua avaˈe ra i roto i te mau tabula! E nehenehe e naeahia taua tapao ra mai te peu e e rave tatou tataitahi i ta ˈna iho tuhaa.
3 Mai te peu e te opua nei tatou e reva, e nehenehe tatou e rave i te taime no te poro na mua ˈˈe i to tatou revaraa. E afai anaˈe i te mau api parau iti, te mau vea iti aore ra te mau vea ia nehenehe tatou e poro i te feia o ta tatou e farerei. Peneiaˈe e nehenehe tatou e faanaho atoa i te tahi taime no te poro e te feia poro i te vahi e te reira tatou.
4 Mai te peu e ua fifihia tatou no te tahi tumu, e nehenehe iho â tatou e apiti atu i roto i te taviniraa. E nehenehe tatou e poro atu i te mau taote, te mau vahine utuutu maˈi aore ra i te tahi atu mau taata atoa o te haere mai e farerei ia tatou. Peneiaˈe e nehenehe atoa tatou e poro na roto i te rata aore ra te niuniu paraparau.
5 Eita e ore e mauruuru vetahi i ta tatou tauturu no te poro i te avaˈe Atete. E rave te mau matahiapo, te mau tavini tauturu e te mau taeae faatere i te mau haapiiraa buka i te mau faanahoraa ia afaihia te tauturu. Teie râ, eiaha roa ˈtu ia moehia ia tatou i te faahoˈi oioi i ta tatou tabula taviniraa i te hopea avaˈe ia nehenehe tatou e taiohia i rotopu i te feia poro no te avaˈe Atete.
6 E poihere anaˈe i ta tatou hopoia taa ê: Ua riro te taviniraa ei ‘parau maitai i tuuhia mai.’ (Tim. 2, 1:14) Te mauruuru nei tatou i te hopoia taa ê i horoahia mai no te poro i te parau apî maitai. (Tes. 1, 2:4) Ia feruri anaˈe tatou i te mau mea atoa o ta Iehova e rave ra no tatou, e turaihia tatou e tia ˈi ia apiti ma te taiva ore i te roaraa o te matahiti, i roto i taua ohipa faufaa roa ˈˈe ra. Eiaha roa ˈtu tatou e vaiiho i te hoê noa ˈˈe mea ia tapea ia tatou ia poro tamau. E faariro anaˈe i te avaˈe Atete ei avaˈe o te vai noa i roto i te mau tabula o te taviniraa a Iehova e e rave anaˈe i te faaotiraa ia poro no nia ia ˈna i te mau avaˈe atoa!—Sal. 34:1.