Eaha ta tatou mau opuaraa no te mau avaˈe Tiurai e Atete?
1 Eita anei ta tatou mau opuaraa faufaa o ta tatou i haamau e naeahia ia tatou ia feruri anaˈe tatou eaha te ravea maitai aˈe no te faaohipa i to tatou taime? Te horoa mai ra te mau avaˈe Tiurai e Atete i te mau ravea huru rau no te turu i te mau faufaa teotaratia. (Mas. 21:5) E hiˈopoa anaˈe i te tahi mau ravea.
2 E tia ia tatou paatoa ia faaô i te tairururaa mataeinaa “E aratai te eˈa o te Atua i te ora” i roto i ta tatou mau opuaraa. E faanaho anaˈe ia tatou e to tatou paoti ohipa ia tae mai tatou i te mau mahana atoa e tupu ai te tairururaa. E oioi anaˈe i te tapao i to tatou nohoraa e te faanaho i to tatou tere.
3 No te aha e ore ai e opua i te haamaitai i ta tatou pororaa? Te horoa nei te mau tau faafaaearaa haapiiraa i te mau taurearea i te ravea ia tamata i te taviniraa pionie tauturu hoê avaˈe i te maoro, aore ra hau atu â. E nehenehe atoa vetahi feia poro e opua e riro mai ei pionie i te avaˈe Atete, no te mea e pae hopea hebedoma taatoa i roto i taua avaˈe ra. E faahope te avaˈe Atete i te matahiti taviniraa e e tahoê ïa tatou i ta tatou mau tutavaraa ia rave faahope roa tatou i te taviniraa.
4 Ua opua anei tatou e turu i te hoê amuiraa o tei hinaaro i te tauturu no te rave faahope roa i ta ˈna tuhaa fenua? E nehenehe te tiaau haaati e faaara i te mau matahiapo i te mau hiaai i ǒ tatou nei. Aore ra, mai te peu e te faaî ra tatou i te mau titauraa no te poro i roto i te hoê tuhaa fenua mea varavara i te ravehia aore ra aita roa ˈtu, e nehenehe ïa tatou e faaara ˈtu i te Taiete. E faaineine mai ïa te mau matahiapo i te hoê parau aniraa na tatou. Mai te peu e e reva tatou no te tau faafaaearaa, e faanaho anaˈe ia tatou no te haere i te mau putuputuraa e no te poro i te vahi te reira tatou. Mai te peu e e haere tatou e farerei i te mau melo o to tatou utuafare e ere i te Ite no Iehova, e opua anaˈe i te tauaparau ia ratou i te parau mau e e faaineine maitai anaˈe ia tatou no te reira.
5 Eaha ta tatou mau opuaraa no te mau avaˈe Tiurai e Atete? Papu maitai iho â ïa, ia itoito faahou mai tatou i te pae tino. Teie nei râ, eiaha roa ia moehia ia tatou i te mau mea faufaa roa ˈˈe, o te turu ia tatou ia î tatou i te itoito i te pae varua. E tamau anaˈe ïa i te tuu i te Basileia i te parahiraa matamua i roto i to tatou oraraa!—Mat. 6:33; Eph. 5:15, 16