“Aita vau e anaanatae ra”
1 E patoiraa matauhia teie i ta tatou poroi i te tahi mau vahi. Eaha te tauturu ia tatou ia ore ia toaruaru i mua i te tâuˈa ore i roto i te tuhaa fenua? E nafea tatou e nehenehe ai e faatupu i te anaanatae i te parau apî maitai?
2 A tapea i te oaoa: E tauturu te haamanaˈoraa no te aha e rave rahi e tâuˈa ore ai ia tatou ia tapea i te oaoa. Aita paha te feia o tei haapii mai i te tauiuiraa o te mau mea ora aore ra o tei paari i roto i te hoê totaiete tiaturi ore i te Atua i ite i te faufaa o te Bibilia. Ua inoino paha vetahi ê i te haavarevare ta ratou i ite i te pae faaroo. No te tahi atu, te faaite ra paha to ratou tâuˈa ore i to ratou manaˈo inoino e tiaturi ore. (Eph. 2:12) E ‘aore roa vetahi i ite’ no te mea ua teimaha roa ratou i te mau tapitapi o te oraraa.—Mat. 24:37-39.
3 Noa ˈtu te huru farii ore o te tahi, e nehenehe tatou e oaoa i roto i te taviniraa, i te iteraa e te haamaitai ra ta tatou mau tutavaraa ia Iehova. (Pet. 1, 4:11) Hau atu â, e faaitoito te paraparauraa no nia i te parau mau, i te feia atoa aitâ e haafaufaa ra i te reira, i to tatou iho faaroo. E tutava anaˈe i te hiˈo i te taata o te tuhaa fenua mai ta Iehova e hiˈo ra. Ua faaherehere oia i te feia no Nineve o tei ore “i ite i to ratou rima atau e to ratou rima aui.” (Iona 4:11) Te hinaaro ra te feia o ta tatou tuhaa fenua i te parau apî maitai! No reira, eiaha tatou e faaea, e tutava anaˈe râ i te imi i te mau ravea no te faatupu i to ratou anaanatae i te poroi o te Bibilia e tia ˈi.
4 A aparau no nia i te mau mea ta te taata i reira e tapitapi ra: Peneiaˈe e nehenehe oe e faahiti i te hoê ohipa ta te taata o te tuhaa fenua e tapitapi ra i roto i ta oe parau omuaraa e e ani i te fatu fare ia faaite i to ˈna manaˈo. A faaroo atu a paraparau ai oia, e a faaite atu i te poroi tamahanahana o te Bibilia e au i ta ˈna e tapitapi ra. I muri aˈe i te hoê ati i tupu i to ˈna vahi, ua faaite te hoê Ite i to ˈna peapea mau i te mau uputa atoa. “Ua haamata taue atura te taata i te paraparau,” o ta ˈna ïa i parau. “E rave rahi aparauraa maitatai ta ˈu i fanaˈo i taua mahana ra, no te mea ua faaite au ia ratou e te anaanatae ra vau i to ratou oraraa.”
5 Na te Basileia o te Atua e faaore i te mau fifi atoa ta te huitaata e faaû ra. A tamata i te haroaroa i ta te fatu fare e tapitapi roa ra. E vaiiho paha o ˈna ia oe ia faataa ˈtu i te poroi tiaturiraa o te Bibilia. Aita anaˈe, e faaroo “faahou atu” paha o ˈna ia oe i te tahi atu taime.—Ohi. 17:32.