‘Ia mauruuru roa tatou’
1 I to tatou nainairaa, ua haapiihia te rahiraa i rotopu ia tatou ia parau e “e e” e “mauruuru” ia faaite mai te hoê taata i te maitai e te aroha. Te faaitoito nei o Paulo ia tatou ia tamau noa i te “mauruuru roa,” e e tia ia tatou ia faaite i te aau mehara i nia iho â râ ia Iehova. (Kol. 3:15, 16) Tera râ, nafea tatou ia faaite i to tatou mauruuru i to tatou Poiete Rahi? Eaha te mau tumu taa ê e mauruuru ai tatou ia ˈna?
2 Ua papai te aposetolo Paulo e: “Ia haamaitaihia te Atua, o tei horoa mai i te re no tatou, no to tatou Fatu ra no Iesu Mesia.” (Kor. 1, 15:57) I te mau matahiti atoa, i te tau o te oroa Haamanaˈoraa, e haamanaˈo tatou i te here otia ore ta te Atua e ta te Mesia i faaite mai na roto i te horoaraa mai i te hoo e nehenehe ai tatou e tiaturi e ora e a muri noa ˈtu a muri aˈe. (Ioa. 3:16) No te rahiraa i rotopu ia tatou, ua pohe te hoê taata herehia e tatou e no reira, te mauruuru rahi nei tatou no te tia-faahou-raa i tǎpǔhia mai e Iesu. E î to tatou mafatu i te mauruuru ia feruri hohonu anaˈe tatou i te tiaturiraa e ora ˈtu i te hopea o teie faanahoraa, ma te ore roa ˈtu e ite i te pohe. (Ioa. 11:25, 26) E mea fifi ia noaa mai i te mau parau no te faaite i to tatou mauruuru no te mau haamaitairaa faahiahia mau ta tatou e fanaˈo atu i te rima o Iehova, i roto i te Paradaiso i mua nei. (Apo. 21:4) Eaha ˈtu ïa mau tumu maitatai aˈe no te “mauruuru roa” i te Atua?
3 Nafea ia faaite i to tatou mauruuru i te Atua: E tano mau â ia haamaitai ia Iehova no to ˈna maitai na roto i te pure. (Sal. 136:1-3) E turai-atoa-hia tatou ia faaite i to tatou mauruuru ia ˈna na roto i te tahi atu mau ravea. Ei hiˈoraa, ia tae mai ïa tatou i te oroa Haamanaˈoraa i te poheraa o te Mesia, i te Sabati 23 no Mati. Ma te oaoa, ‘te faatura ˈtu nei tatou ia Iehova i ta tatou mau taoˈa rarahi,’ no te turu i ta tatou amuiraa e te ohipa na te ao nei i te pae moni. (Mas. 3:9) Te turu taatoa nei tatou i te mau matahiapo e te rave amui nei tatou i te ohipa e o ratou, ma te faaite atoa i to tatou aau mehara ia Iehova no te tauturu o ta ˈna e horoa maira na roto i to ratou arai. (Tes. 1, 5:12, 13) I te mau mahana atoa, te tutava nei tatou i te pee i te hoê haerea tia o te faahanahana i te iˈoa o te Atua. (Pet. 1, 2:12) Te oaoa nei Iehova i teie mau tapao haamauruururaa atoa.—Tes. 1, 5:18.
4 Te faaiteraa nehenehe roa ˈˈe o to tatou mauruuru: Te apitiraa ma to tatou nephe atoa i roto i te pororaa i te Basileia, te faahanahanaraa i te iˈoa o Iehova, te faaiteraa i to tatou mauruuru na roto i te pure, te parururaa i te parau mau ma te haapao maitai, ua riro teie mau ohipa atoa ei mau faaiteraa nehenehe roa ˈˈe o te hoê mauruuru no roto roa mai i te mafatu, o ta tatou e nehenehe e faatae atu i to tatou Poiete no te mau mea atoa o ta ˈna i rave no tatou nei. Te hinaaro nei o Iehova “i te taata atoa ia ora” e te oaoa nei oia i te iteraa mai ia tatou ia pûpû no ˈna i te hoê taviniraa moˈa ia nehenehe to ˈna hinaaro ia tupu. (Tim. 1, 2:3, 4) No reira, e rave rahi feia poro e maraa ia ratou o te farii nei i te titauraa i faataehia i roto i Te taviniraa o te Basileia no Febuare, na roto i te raveraa i te taviniraa pionie tauturu hoê avaˈe aore ra hau atu, i te mau avaˈe Mati, Eperera e Me. Te hoê ravea maitai roa no te “mauruuru roa” i te Atua, o te ohiparaa rahi atu â ïa i roto i te taviniraa. E riro anei tatou ei pionie i te avaˈe Eperera, e i te avaˈe Me?
5 Ua horoahia mai te tiaturiraa papu e ora e a muri noa ˈtu. I te mea e ua fatata roa teie tiaturiraa i te tupu, mea rahi atu â te mau tumu no te tamau noa i te haamaitai ia Iehova ma te oaoa i te mau mahana atoa.—Sal. 79:13.