E apiti anaˈe i roto i te hoê ohipa o te ore roa e rave-faahou-hia
1 I te mau tau huru rau o te Aamu, ua faatupu o Iehova i ta ˈna haavaraa i nia i to ˈna mau enemi. Tera râ, no to ˈna aroha, ua horoa oia i te hoê ravea faaoraraa no te feia mafatu tia. (Sal. 103:13) E mea faufaa roa ïa to ratou huru no te ora mai.
2 Ei hiˈoraa, na mua ˈˈe i te Diluvi, i te matahiti 2370 hou to tatou tau, ua riro na o Noa ei “taata [“poro,” MN] i te parau-tia.” Te feia tei ore i tâuˈa i te faaararaa no ǒ mai i te Atua ra, ua pohe ïa. (Pet. 2, 2:5; Heb. 11:7) Na mua ˈˈe i te haamouraahia o Ierusalema, i te matahiti 70 o to tatou tau, ua faaite maitai o Iesu e eaha te tia ia rave no te ora mai i te haamouraa e tupu i nia i te oire. Te feia atoa tei patoi i ta ˈna poroi faaararaa, ua faaruru ïa i te mau faahopearaa iino. (Luka 21:20-24) E rave rahi taime te horoaraahia teie mau huru faaararaa e mau haavaraa no ǒ mai i te Atua ra i roto i te Aamu.
3 Te hoê ohipa faaararaa i to tatou nei tau: E mea maoro i teie nei, ua parau o Iehova e e faatae mai oia i to ˈna riri i nia i teie nei faanahoraa ino, e o te feia haehaa anaˈe te ora mai. (Zeph. 2:2, 3; 3:8) Te tere oioi roa nei te taime e toe ra no te faaite haere i teie faaararaa! Te fatata roa maira te “ati rahi,” e te haaputuputuhia nei te feia haehaa. Inaha, “te mau aua ra, ua teatea ïa i teie nei ua auhune.” No reira, aita e ohipa ê atu, faufaa e te ru roa ˈˈe i teie.—Mat. 24:14, 21, 22; Ioa. 4:35.
4 I teie mahana, e tia ia tatou ia faaite haere i teie faaararaa i to tatou mau taata-tupu, ia “faaroo mai, e ia ore hoi ia faaroo mai.” E hopoia teie ta Iehova i horoa mai, te ore e tia ia tatou ia patoi. (Ezek. 2:4, 5; 3:17, 18) Na roto i te apiti-taatoa-raa i roto i taua ohipa ra, te faaite ra ïa tatou ma te papu maitai, i to tatou here hohonu no Iehova, to tatou anaanatae haavare ore i nia i to tatou taata-tupu e to tatou faaroo aueue ore i roto i to tatou Faaora ra o Iesu Mesia.
5 Teie te taime no te ohipa: I mutaa iho, i muri aˈe i te tupuraa te mau haavaraa a Iehova, ua tupu faahou mai te ino, no te mea te haa noa ra o Satani e ta ˈna mau demoni. I teie râ taime, mea taa ê ïa. E faaorehia te mana o Satani. Eita e titau-faahou-hia ia faaite haere i te faaararaa na te ao nei no nia i te fatataraa mai te hoê “ati rahi.” (Apo. 7:14; Roma 16:20) E haamaitairaa taa ê ta tatou e apiti i roto i te hoê ohipa o te ore roa e rave-faahou-hia. Teie te taime no te rohi i roto i taua ohipa ra.
6 Ma te tiaturi papu, teie ta te aposetolo Paulo i parau no nia i ta ˈna ohipa pororaa: “Aore roa o ˈu viivii i te toto o te taata atoa nei.” (Ohi. 20:26) Ma te ore e faaea i te faaite haere i te faaararaa, aita oia i manaˈo e e utua toto ta ˈna. No te aha? No te mea ua nehenehe oia e parau no nia i ta ˈna taviniraa e: “I ohipa atoa ˈi hoi au nei, i te tautoo-maite-raa.” (Kol. 1:29) E apiti taatoa anaˈe ïa i roto i taua ohipa ra o te ore roa e rave-faahou-hia, e e ite atoa tatou i te hoê â oaoa e to Paulo!—Tim. 2, 2:15.