‘Te poro nei tatou i te parau’
1 I to tatou nei tau, ia au i te faataaraa a te Bibilia no nia i te “anotau hopea,” e “hohoˈa paieti” to te rahiraa o te mau taata. (Tim. 2, 3:1, 5) No te mea ïa e aita te mau raatira haapaoraa i manuïa i te horoa i te hoê aratairaa mau i te pae varua na ta ratou mau nǎnǎ. Aita te mau upoo faatere a te Amuiraa faaroo kerisetiano e turu ra i te Bibilia. Maoti i te poro i te Parau a te Atua, mea au aˈe na ta ratou mau taata e faahiti noa i te mau haapiiraa faufaa ore a te mau philosopho e a te feia tuatapapa i te faaroo, aore ra e pûpû i te mau opuaraa i te pae totiale e i te pae politita. Aita te mau raatira haapaoraa e rave rahi e tiaturi ra i te Bibilia. Te faariro nei ratou i te reira ei buka tahito e, inaha, te turu nei ratou i te haapiiraa e mea tupu noa mai te mau mea, eiaha râ te haapiiraa a te Bibilia no nia i te Poiete rahi. Aita roa ˈtu te rahiraa o te mau ekalesiatiko e faaohipa ra i te iˈoa iho o te Atua, e aita ratou i patoi noa ˈˈe i te iritiraahia taua iˈoa ra i roto i te mau tatararaa apî o te Bibilia.
2 Oia atoa, mai te mau raatira haapaoraa i te tau o Iesu, te poro nei te mau ekalesiatiko i teie mahana ma te faufaa ore. (Mat. 15:8, 9) O ta te peropheta ra o Amosa iho â i faaite atea. Te tupu ra “te oˈe . . . e ere râ i te oˈe maa ore, e te hiaai i te pape, i te faaroo râ i te parau a Iehova.” (Amo. 8:11) Hau aˈe i te tahi atu mea, te hinaaro nei te mau taata i te maa pae varua i roto i te Parau a te Atua.
3 Nafea ia haamâha i te mau hinaaro pae varua o te mau taata: Ua aˈo o Paulo ia Timoteo ia ati maite atu i “te parau moˈa i papaihia ra, o te parau ïa e paari ai . . . e tae noa ˈtu i te ora,” e ua faaue hua ˈtu oia ia ˈna ia ‘poro i te parau.’ (Tim. 2, 3:14, 15; 4:2, MN) Ei mau Ite no Iehova, e tia ia tatou ia ati maite i te mea o ta te Bibilia e haapii ra ia poro anaˈe tatou, ma te pee ïa ia Iesu, to tatou Hiˈoraa, o tei na ô e: “[E] ere i ta ˈu ta ˈu e haapii nei, na ˈna râ, na tei tono mai ia ˈu nei.” (Ioa. 7:16) Ua niuhia ta tatou haapiiraa i nia i te Parau a te Atua, no te mea te vai ra i roto te paari no ǒ mai i te Atua ra, e te hinaaro nei tatou e faaite i te taata e nohea mai te mau haamaramaramaraa o ta tatou e poro nei.—Kor. 1, 2:4-7.
4 Ia ite te mau taata e o vai o Iehova e ia faatupu ratou i te faaroo i roto ia ˈna, e tia ia ratou ia faaroo na mua i te parau mau i roto i te Bibilia. No reira o Paulo i papai ai e: “Eaha hoi ratou e tia ˈi ia faaroo ia ˈna, i tei ore ratou i ite ia ˈna? e eaha hoi ratou e ite ai i te faaite ore?” (Roma 10:14) Ma te poro i te Parau a te Atua, te tauturu nei tatou ia vetahi ê ia noaa ia ratou te faaroo na roto i te ite papu. E mana to taua ite ra no te haamaitai i te mau taata, e o ta ˈna iho â e rave nei. Ua papai te taata papai Beretane ra o Charles Dickens no nia i te Bibilia e: “Teie hoi te buka maitai roa ˈˈe i vai na e o te vai â na te ao nei, no te mea te horoa ra oia i te mau haapiiraa maitatai roa ˈˈe, o te aratai nei i te hoê taata e tutava ra i te riro ei taata haerea parau-tia e te haapao maitai.”
5 Te ite maite nei te feia e poia ra i te parau mau pae varua e ua niuhia te reira i roto i te Parau a te Atua iho. I te matahiti 1913, ua horoahia na Frederick Franz, e taata haapii apî oia i taua tau ra, te hoê vea iti ra Teihea te feia pohe? I muri aˈe i to ˈna taioraa ma te anaanatae rahi i te pahonoraa a te Bibilia no nia i taua uiraa ra, ua na ô oia e: “Teie te parau mau!” Ua farii te mau mirioni taata e imi ra i te parau mau i teie manaˈo. E tamau anaˈe i te poro i te Parau ma te haamarirau ore e te itoito, ma te ite ïa i te oaoa i te faarooraa ia vetahi ê ia parau e: “Teie te parau mau!”