E ora te mau huru taata atoa
1 Te hinaaro ra o Iehova “i te taata atoa ia ora, e ia noaa te ite i te parau mau.” (Tim. 1, 2:4) Oia mau, te faaruru nei te mau taata, i roto i te tahi faito, i te mau faahopearaa o te mau huru no ǒ mai i to ratou tupuna, i te mana o to ratou oraraa tumu e to ratou vahi nohoraa, tera râ, e tiamâraa to ratou e na ratou iho e faaoti e eaha ta ratou e rave i roto i to ratou oraraa. E nehenehe ta ratou e rave i te maitai e e ora, aore ra e rave i te ino e e pohe. (Mat. 7:13, 14) Nafea te reira ia ohipa i nia i ta tatou hiˈoraa i te taata, o ta tatou e faaite atura i te parau apî maitai o te Basileia?
2 Eiaha tatou e manaˈo oioi noa e e anaanatae mai te hoê taata i te parau mau, no te tahi mau tumu, mai te huru oraraa i te pae nunaa, i te pae ihotumu, aore ra i te pae totiale. Te huti maira te parau mau i te feia tei ore i haere e tei haere atoa i te haapiiraa teitei, e tae noa ˈtu i te feia politita, te feia toroa, te feia tiaturi ore i te Atua, te feia e feaa nei no nia i te Atua, aore ra te feia rave hara matauhia. Ua taui te mau taata no te mau huru oraraa e te mau tiaraa totiale atoa, i to ratou haerea e te tiaturi nei ratou i teie nei e ora e a muri noa ˈtu i roto i te Paradaiso. (Mas. 11:19) No reira, eiaha tatou e haamarirau i te faaite i te poroi o te Basileia i te mau huru taata atoa.
3 E hiˈo anaˈe na i te mau hiˈoraa i muri nei: Ua opua te hoê taata e haapohe i to ˈna papa apî, aita râ oia i na reira. I muri iho, ua opua ˈtura oia e haapohe ia ˈna iho, aita râ oia i manuïa. Ua tapeahia ˈtura oia i te fare auri, no te ohipa eiâ e te hooraa i te raau taero, e ua taa oia e ta ˈna vahine. I teie mahana, te ora nei teie taata i te hoê oraraa parau-tia, te oaoa ra to ˈna faaipoiporaa e mea afaro roa oia e to ˈna papa apî. Na te aha i faataui ia ˈna? Na te haapiiraa i te Bibilia e te mau Ite no Iehova e te faaohiparaa i te mea o ta ˈna i haapii. Aita o Iehova i manaˈo e e ore roa oia e taui.
4 Ua riro na te hoê vahine apî ei vahine hauti teata tuiroo, aita râ te reira i faaoaoa ia ˈna. No to ˈna maere i te haerea morare maitai roa o te mau Ite, ua farii oia i te hoê haapiiraa o te Bibilia e ua haamata oioi atura oia i te faaite i te parau apî maitai o te Basileia ia vetahi ê. I te mau vahi atoa e poro ai oia na te mau uputa, e ite mai te taata e o vai o ˈna, tera râ, ua faataa oia ma te oaoa e mea hau aˈe na ˈna ia itehia mai oia ei Ite no Iehova, eiaha râ ei vahine hauti teata.
5 Ua faanaho te hoê tuahine i te hoê taime farereiraa e te hoê taata o tei tamatahiti i Te Pare Tiairaa, no te haapii i te Bibilia, e ua apiti mai te hoê vahine tapiri, tei faarooroo i te reira, i roto i te haapiiraa. Ite oioi atura teie vahine tapiri e teie te parau mau o ta ˈna i imi noa na! Aita o ˈna e ta ˈna tane i faataa faahou, e ua hau atura raua. Mea au roa na ˈna te peu hiˈohiˈo e e rave na oia i te mau peu tahutahu, tera râ, ua faarue oia ma te aau tae i te mau buka moni roa e te tahi atu â mau mea atoa ta ˈna, i taaihia e te mau peu demoni. Ua haere oioi atura oia i te mau putuputuraa e ua paraparau i to ˈna fetii e i to ˈna mau hoa no nia i to ˈna faaroo apî. I teie mahana, te poro nei oia ma te oaoa ia vetahi ê.
6 Eiaha tatou e faaoti oioi noa no nia i te mau taata. Tera râ, e faaite tatou i te parau apî maitai ma te itoito i te mau vahi atoa. E mau tumu atoa ta tatou no te tiaturi e e riro o Iehova o te ‘hiˈo i te aau,’ ei ‘Faaora o te taata atoa nei.’—Sam. 1, 16:7; Tim. 1, 4:10.