‘Te turu i te tau e au ai ra’
1 Auê te oaoa e ia fanaˈo i te turu i te taime mau e hinaarohia ˈi! (Heb. 4:16) I te tairururaa mataeinaa “Te mau vea o te hau a te Atua,” ua oaoa mau â tatou i to tatou fanaˈoraa i te taime au mau, i na papai e piti o tei riro ei turu faufaa roa no tatou.
2 Ua tae mai te buka apî, Te ravea e itehia ˈi te oaoa i te utuafare, i te taime tano mau. Te tuu ra oia i te tapao i nia e maha tumu faufaa roa no te fanaˈo i te hoê oraraa utuafare oaoa: 1) te hitahita ore, 2) te auraroraa i te mana, 3) te tauaparauraa maitai e 4) te here. E tauturu te mau aˈoraa e vauvauhia ra i roto i te buka ra Oaoa i te utuafare i te mau utuafare atoa o te faaohipa i te reira, ia fanaˈo i te hau a te Atua. Ia faaherehere tatou i te taime no te taio maitai e no te tuatapapa i teie buka i roto i te utuafare. Ia ite maitai tatou i to ˈna mau vahi taa ê ia ineine tatou i te faaohipa i teie buka ma te aravihi ia pûpû atu tatou na te taata no te taime matamua, i te avaˈe Mati.
3 Ua tae mai te vea iti apî, Eaha ta te Atua e titau ra ia tatou?, i te taime tano roa no te turu i te faaoioiraa o te ohipa faariroraa i te taata ei pǐpǐ. Noa ˈtu e ua faaineine-taa-ê-hia oia no te feia e fifi ra i te taio, e rave rahi feia paari o tei ite i te taio e tae noa ˈtu te mau tamarii, o te fanaˈo atoa i ta ˈna mau tatararaa ohie no nia i te mau haapiiraa tumu a te Bibilia. Peneiaˈe e riro mau oia ei mauhaa titauhia no te haamata i te hoê haapiiraa, a faahaere atu ai i muri iho i nia i te buka ra Te ite. Aita e feaaraa e e tauturu teie vea iti i te mau taata hau atu â, ia ite i te mau haamaitairaa e rave rahi o ta ratou e nehenehe e fanaˈo, mai te peu e e rave ratou i ta te Atua e titau ra ia tatou.
4 Ua faataa maitai o Davida i to tatou mau manaˈo ia ˈna i parau e ‘aore roa oia i ere, ua faaitoitohia to ˈna nephe, e ua î ta ˈna aˈua.’ (Sal. 23:1, 3, 5, MN) E oaoa tatou i te vaiihoraa i teie mau papai Bibilia maitatai roa na te mau taata e rave rahi e hinaaro mau nei e ite i te Atua mau ra o Iehova e e tavini ia ˈna.