Pahonoraa i ta outou mau uiraa

◼ Ehia maororaa tatou e haapii ai e te hoê taata i nia i te buka ra Te ite?

Te haamaitai nei Iehova i to ˈna nunaa i teie mahana. Te ite nei tatou i te haapapuraa ia farii anaˈe te mau tausani taata apî i te parau mau i te mau matahiti atoa. Te faaite ra te mau ohipa i tupu e, ua riro te buka ra Te ite ei mauhaa aravihi mau no te haapii i te parau mau. Ua huti Te Pare Tiairaa o te 15 no Tenuare 1996 i to tatou ara-maite-raa i nia i te mea e ua faaineinehia teie buka no te tauturu i te taata haapii Bibilia ia haere oioi noa i mua; e navai noa paha te tahi tau avaˈe e tapae atu ai oia i te bapetizoraa.

No reira, te haapapu nei teie noâ Pare Tiairaa i te api 17 e: “Ia faaoti te hoê taata i ta ˈna haapiiraa Bibilia i nia i te buka [ra Te] Ite e ua bapetizohia oia, aita e faufaa ia faatere i te haapiiraa . . . e o ˈna i nia i te piti o te buka.”

Eaha ta tatou e rave mai te peu e ua oti te buka ra Te ite e aita te taata poro i ineine no te bapetizoraa? Ua faahaamanaˈo Te taviniraa o te Basileia no Tiunu 1996, i te api 6, paratarapha 23, i te aˈoraa i horoahia i roto i Te Pare Tiairaa eiaha e haapii i te piti o te buka i muri aˈe i te buka ra Te ite. Te auraa anei ïa e e faaea tatou i te tauturu i te taata haapii ia haere i mua? Eita. Te hinaaro nei tatou e ia noaa i te mau taata te ite matamua o te parau mau. Tera râ, e tano ia manaˈo e, i roto i te mau huru tupuraa matauhia, e nehenehe te hoê taata faatere haapiiraa aravihi e tauturu, i roto i te hoê area taime poto, i te hoê taata haapii aau haavare ore ia haere i mua, e nehenehe ai oia e faaoti ma te ite maitai i ta ˈna ohipa e rave ra, e tavini ia Iehova. Peneiaˈe, ia au i to ratou huru tupuraa, e hinaaro vetahi feia haapii e haapii e rave rahi taime i roto i te hebedoma.

E tia ia farii e e mea taere aˈe vetahi feia haapii i te tahi. Tera râ, mai te peu e ia oti te haapiiraa i te buka ra Te ite, o te nehenehe e rave-maoro-hia i te tahi taime, aitâ te taata i opua ˈtura e apiti i roto i te amuiraa, e mea maitai ia paraparau atu te taata poro i te hoê matahiapo no roto i te tomite o te taviniraa no nia i teie ohipa. Mai te peu e mea titauhia no te tahi mau tupuraa taa ê, e nehenehe e horoahia i te tauturu hau atu, ia au maite i te manaˈo i faataahia i roto i Te Pare Tiairaa o te 15 no Tenuare 1996, i te api 17, mau paratarapha 11-2.

E tia i te hoê taata haapii o tei tauturuhia ia ite i te parau mau, noa ˈtu e i roto noa i te mau reni rarahi, ia turaihia, no to ˈna mauruuru, ia haere i te mau putuputuraa kerisetiano. E aratai paha te reira ia ˈna ia faaite papu e te hinaaro ra oia e tavini ia Iehova. Mai te peu e, i muri aˈe i to ˈna haapiiraa i te buka ra Te ite no te hoê tau maoro, eita iho â te taata haapii e faaite e te haafaufaa ra oia i te mau mea pae varua, peneiaˈe e mea maitai aˈe ia faaea i te haapiiraa.